New York, Rymphang:
Katkum ki khubor, la ong ba ka la mih ka jingbthei ha kawei ka ïingmane hapoh ka nongbah New York ha ka Sngi Ba-ar, ha kaba 5 ngut ki la mynsaw na katei ka jingjia, kynthup ia uwei u dkhot ka tnat pynlip ding uba la mynsaw jur ha katei ka jingjia.
La ong ba ki pulit ka New York ki dang tohkit bniah halor ka daw jong katei ka jingbthei, kaba la jia ha ka por kumba 10:30 baje jong katei ka step Sngi Ba-ar, ha ka ïingmane jong ka tnat Balang Abundant Life Fellowship Church kaba don ha ki thaiñ nongkyndong, kumba 50 Mile lane 80 Kilometer na ka phang Shatei Lam Mihngi jong ka Syracuse.
Haba iadei bad kane ka jingjia, la ong ba ki bor pyniaid ki la ioh ban pynkit noh ia 5 ngut kiba mynsaw sha ka jaka sumar ba kham hajan bad 2 ngut napdeng jongki, ki dei kiba la mynsaw jur bha bad kiba ka jingim jongki ka la don hapdeng ka jingma kaba khraw. Ia kitei ki 3 ngut pat kiba shu mynsaw malu- mala, la sumar ha katei hi kajuh ka jakasumar bad la ong ba kam shym don jingma eiei ia ka jingim jongki.
Ki pulit ki iathuh ba kim shym la iohi dak eiei haba iadei bad katei ka jingbthei ha katei ka ïingmane, ha kaba ka tdem kaba iong bad ba rben ka la kiew shalor suiñ na katei ka jaka hadien ka jingbthei ha katei ka sngi.
