Shillong, Rymphang 18
U Myntri Rangbah ka Jylla, u Conrad K. Sangma ha ka Sngi Balang u la kynnoh ba ka jingpulom ban pynïeng ïa ki jaka-rung jaka-mih (Entry-Exit Point) ha Meghalaya ka dei namar ki jingbakla ba la leh da ki Sorkar barim ha u snem 2016.
“Mynta, kum ki nongthaw aiñ, ngi tip ba phim lah ban don kaei-kaei ha ki kyndon ka bym shym la bthah ha ka aiñ,” la ong u Conrad haba kdew ïa ka Meghalaya Residents, Safety and Security Act (MRSSA), 2016.
“U LO u tip, kum u Myntri Rangbah ha kata ka por ba ïa ki jaka-rung jaka-mih ym shym la bthah katkum ka aiñ MRSSA, hynrei la buh ïa ki ha ki kyndon ha ka jingpyntreikam ïa ka MRSSA, bad kumta kam lah ban ïeng ha ka jingshah bishar bniah ka ïingbishar,” u la ong.
U Myntri Rangbah u la ban jur ba ki ‘Rule’ ki don ïa ki kyndon na ka bynta ki jaka-rung jaka-mih, hynrei ïa kine ym shym la kyrshan da ka aiñ, kaba pynlong pat kaba eh ban pyntreikam ïa ki.
U Nongïalam ka Liang Pyrshah, u Dr. Mukul Sangma u la kyntait ïa katei ka jingkam u Myntri Rangbah da kaba kdew ïa ka jinglap jong ka Meghalaya High Court halor ki ‘Facilitation Centre’.
“Ka jingpynsngew jong ka Ïingbishar ka long ba ha ka jingbym don jong ki kyndon kiba biang – kiba la pynwandur ban pyntreikam ïa kine ki ‘Facilitation Centre’… u (CM) la ïalam bakla ïa ka Ïingdorbar ba ka MRSSA kam shym la lah ban ïeng rasong ha ka jingbishar bniah jong ka Ïingbishar,” u la ong.
U Conrad Sangma u la pynskhem ba u la kdew tang ïa ka mat jong ki jaka-rung jaka-mih ki bym shym la shah kynthup ha ka aiñ.
“Nga la kren shai ba ka bynta jong ki khyrdop rung-mih kam shym la don ha ka aiñ hynrei ka don hangta ha ki ‘Rule’… kano-kano kaba don ha ki kyndon dei ban kyrshan da ka aiñ.”
Na ka liang u Myntri Rangbah u la mynjur ban wanrah ïa ka hukum jong ka Meghalaya High Court bad ki kot ki sla kiba ïadei, kynthup ïa ka aiñ bad kyndon jong ka MRSSA, ban pynshai ïa ka jinglong-jingman.
“Ngin sa wanrah ïa kata bad ngin wanrah ruh ïa ki kyndon ba kyrpang jong ki ‘Rule’ ba la thaw da ka Sorkar ha kata ka por, kumjuh ïa ka aiñ ban pyni ba kam don kano-kano ka kyndon ha ka aiñ ban pynïeng ïa ki jaka-rung jaka-mih,” u la ong.
