Srinagar, Rymphang:
U Myntri ka sorkar pdeng jong ka Law and Justice u Arjun Ram Meghwal u la pynpaw ïa ka jingkhmih lynti ha kaba ïadei bad ka jingpynphai biang ïa ka jinglong jylla sha ka Jammu & Kashmir hadien ka jingkren jong u ba ki briew “kin sa ïohsngew shen ïa ka rai ha kane ka bynta.”
“Ka phang ban pynlong jylla Jammu & Kashmir ka long kaba khia bha,” la ong u Myntri ka sorkar pdeng ha ki nongthoh khubor ha Srinagar hadien ka jingïalang jong ka thaiñ halor ka Tele-Law kaba la pynlong ha SKICC, hangne.
“U Myntri ka tnat ki kam pohïing jong ka sorkar pdeng u Amit Shah u la dep ban pynthikna ha Lok Sabha ba ïa ka jinglong jylla yn pynphai biang sha ka J&K. Ïa kata ka hok yn ai sha ka J&K hynrei ka don ka rukom treikam na ka bynta kata,” la ong u Myntri.
Haba pynpaw shaphang ka jingpynphai biang kloi ïa ka jinglong jylla, u Meghwal u la ong, “Nga sngew ba shen phin sa ïohsngew ïa ka rai ha kane ka bynta.”
Hadien ba la weng noh ïa ka Article 370 bad pynïakhlad bad pynhiar kyrdan ïa ka jylla J&K barim sha ki ar tylli ki UT–ka Jammu bad Kashmir (ba don ka ïingdorbar thaw aiñ) bad ka Ladakh (khlem ka ïingdorbar thaw aiñ) da ka sorkar pdeng, u Myntri Rangbahduh ka ri u Narendra Modi bad u Myntri ka tnat ki kam pohïing u Amit Shah ki la pynthikna ban pynphai biang ïa ka jylla JK ha ka por ba biang.
