Shillong, Rymphang
Ka Executive Member (EM) ba khmih ïa ka tnad Law ha KHADC, ka Kong Deity H Majaw ka la ïathuh ba don hynriew tylli ki Village Court kiba treikam ha ki jaka ka District Council.
Ïa kane ka Kong Deity ka la pyntip ha ka kynta kylli jingkylli halor ka jingkylli ba la wanrah da ka MDC ka Nongpoh Constituency ka Kong Rona Khymdeit.
Ka Kong Deity ka la ïathuh ba kine ki 6 tylli ki Village Court ki kynthup ïa ka Nongjri Village Court kaba hap hapoh ka Nongjri Sirdarship, ka Tyrna Village Court kaba hap hapoh ka Tyrna Sirdarship, ka Village Court Wahlong Sirdarship, ka Village Court Raid Nongskeh kaba hap hapoh ka Sohïong Lyngdohship, ka Tynrong Village Court bad ka Mawbuh Village Court kaba hap hapoh ka Hima Mylliem.
Ka Kong Deity ka la ong ba ha ki Village Court ki don haduh 6 ngut ki dkhot bad ym dei ban duna ïa ka 2 ngut ki dkhot bad bynrap ruh ba ka samoi treikam jong ki Village Court ka long 5 snem bad hadien man la ka 5 snem ki Village Court kin hap ban ban pynthymmai ïa ka samoi treikam na ka District Council.
