Shillong, Rymphang 19
U Chief Excecutive Member jong ka Khasi Hills Autonomous District Council (KHADC) u Bah Winston Tony Lyngdoh u la pyntip ba ka jingtohkit ki pulit ka dang ïaid haba ïadei ka jingjia ba shah tuh pisa bad ki kot ki sla na ka ophis u Excecutive Member (EM) Elaka ha ka 4 tarik Rymphang 2026.
Ïa kane u Bah Winston u la jubab ha ka Zero Hours ba la wanrah da u MDC ka Shella Constituency u Bah Barikupar Synrem ha ka dorbar hapoh KHADC.
U nongïalam ka Liang Pyrshah u Bah Titostarwell Chyne haba ïa shimbynta haba ïadei bad kane u la kdew ba kane ka jingjia ba shah tuh hapoh ka shlem treikam ka Council ka long kaba la ktah ïa ka burom ka ijot jong ka ophis bad ong ruh ba ka dang dei ka sien ba nyngkong ba kum kine ki jingjia ki jia.
U la ong ba kane ka jingjia ka dei kaba pynsammut shibun namar ka jingjah ka pisa ba tang T. 2000, hynrei watla ka long ka barit ruh ba nangne sha khmat ki EM, ki nongtrei lane mano-mano ruh ba kin ym dei ban buh pisa hapoh ophis khnang kan ym long ka jingduhnong.
Shuh-shuh u la ai jingmut ban pynbiang ïa ki kor CCTV, ban pynkhlaiñ ïa ki nongap pahara ba kan long ruh ka jingshngaiñ ïa ka shlem treikam jong ka KHADC bad ban pynthikna ba kum kine ki jingjia ba kin ym jia shuh nangne shakhmat, haba ïadei kane na ka liang jong u CEM u la pynshai ba hadien jong ka jingjia ka EC ka la buh ïa ka ejahar bad ka tnad pulit ka dang pynlong ka jingpeit bniah bad kim pat lah ban ai kaiphod, haba ïadei ka jingpeitngor ïa ka ophis haduh mynta ki don 32 tylli ki kor CCTV kiba la buh ha ki bynta bapher-bapher jongka KHADC bad pynpaw ba dang don shuh ki bynta ba dang donkam ban buh ïa ki kor CCTV, na ka liang ka EC kan sa dang peit bad kan sa leh ïa kaba donkam.
