Shillong, Rymphang 19
U Bah Roykupar Synrem, President ka Hynñiewtrep Youths Council (HYC) u la ong ba hadien ba la ïohi ïa ka jingwanrah ka Sorkar Jylla ïa ka Kaiphod Reservation Policy ha Ïingdorbar Thawaiñ ka Jylla da kaba khmih lynti ba ka jaitbynriew kan kmen hynrei ka pynduhnong bad pynduh jingmyntoi pynban.
Haba kren sha ki lad pathai khubor ha ka sngi Palei jong ka taïew, u Bah Roykupar Synrem u la ong ba naduh ba sdang ka Reservatiom Policy jong u snem 1972, la kren ban wanrah khnang halor ka jingdon briew ha ka Jylla, ba kynthup ïa ki Khasi & Jaiñtia bad ki Garo. Da kaba ong ba dei ban don ka jingkylla, namar ka jingbun paid hi dei ki Khasi & Jaiñtia ban ïanujor bad ki jaitbynriew Garo.
Nalorkata, u ong ba ïa kane ka bhah thungkam thungjam la pynshong nongrim katkum ka jingbun paid hynrei ha kane ka kynti ba mynta pat ka Expert Committee ka ong pynban ban pynneh kumjuh.
Namarkata, u ong ba kumba ka long mynta hi kane ka Expert Committee kaba la thung da ka Sorkar Jylla, kam shym la pynhun ne pynïoh nong ïa ka jaitbynriew.
“Ka Sorkar ka la ai ka bor hynrei balei ba kane ka Expert Committee kam wanrah ïa ka data ban lum ban pynbeit bad kaei kaba kane ka Expert Committee ka leh baroh shi katta? La buh jingkylli u Bah Roykupar.
Ka seng ka la dawa ba dei ban ai ïa ki Khasi & Jaiñtia 50 percent bad ïa u Garo pat 40 percent katkum ka jingbun paid hynrei kam shym la urlong haduh mynta.
“Kane ka kaiphod jong ka Expert Committee ka long ba ka jaitbynriew ka wanrah ïa ka jingduh jingmyntoi shibun”, la bynrap u Bah Roykupar.
U la kdew ruh ha kawei ka liang ban pynneh kumba ka long ha kawei ka liang pat ba kane kajuh ka Expert Committee ka wanrah ban pynkylla. “Ngi dei ban ïoh bun ka bhah thungkam ban ïa u Garo”, u la bynrap.
