Shillong, Rymphang 19
U Myntri Rangbah ka Jylla Conrad K Sangma u la kular ha ïingdorbar ba ka Sorkar Jylla kan sa shong bishar biang bad wanrah jingpynkylla ïa ka Meghalaya Residents Safety and Security Act (MRSSA), 2016, ban lah leh eiei halor ki jingsngewkhia kiba ïadei bad ka jingwan rung beaiñ ki mynder ri.
Kane ka jingpynkylla ka thmu ban pynthikna ba ka Act kan ïeng rasong lada ka shah bishar ha ïingbishar bad ka Sorkar Pdeng.
“Nga kular ïa ka ïing ba ngin sa shong bishar biang ïa kiei kiei baroh bad ngi peit ha kano ka rukom ngin wanrah ïa ka jingpynkylla ha ka MRSSA, kaba lah ban ïeng rasong ha ka jingbishar ki ïingbishar ne ka Sorkar Pdeng bad ka Parliament,” ong u Conrad haba jubab ïa ka resolution bala wanrah da u Nongïalam ka Liang Pyrshah Mukul Sangma, uba kyntu ïa ka Sorkar ban pyndep noh ïa baroh ki kam ba ïadei bad ka jingpynïeng ïa ki Facilitation Centre ha ki Entry-Exit Point bala dep ithuh ki ban long ryngkat ki kyndon treikam ba thikna bad ban buh lut ïa baroh ki lad jingïada kumba la kdew ha ka MRSSA, 2016.
U pyntip ba ha ka jingshisha, ka Ministry of Home Affairs (MHA) kaba bthah ïa ka Sorkar Jylla ba kan shong bishar biang ïa ka MRSSA.
“Ka MHA kala bthah ïa ki ban ïakhmih biang ïa ki kyndon ka MRSSA. Ngi la ïashong bad ka tnad Aiñ, AG bad ka tnad Kam Pohïing ban ïaid lyngba ïa baroh ki aiñ bad ki kyndon kiba kyllaiñ,” ong u Conrad.
U la ïathuh ba ka Sorkar ka don ruh ïa ka jingthmu ban pynim ïa ki Entry-Exit Point lyngba ka Immigration and Foreigners Act, 2025, da kaba pynrung ïa ka kyndon Restricted Area. “Kane ka dei ka kam kaba ngi pyrshang ban leh,” u la ong.
Haba pdiang ïa ki jingai jingmut halor kane ka kam, u Conrad u la ong, “Lada donkam ïa ngi ban ïakren bad ki seng saiñ pyrthei….ngi pdiang ïa ka. Ngin sa pynlong ïa ka jingïalang ban ïakren bad shim ïa ki jingai jingmut ba ha kano ka rukom ngin pynkylla ïa ka MRSSA bad ban nang aibor shuh shuh ïa ka”.
U Conrad u la pynpaw ba ki lad kamai kajih ka dei kaba pynshlur ïa ka jingwan rung beaiñ ki mynder ri bad ong, “Ki (mynder ri beaiñ) ki la wan shane namar ka ïoh ka kot, ki ïa ïoh kam ban trei”.
Haba pynpaw ïa ka jingsngewhun ïa ka jubab u Myntri Rangbah, u Mukul Sangma u la weng noh ïa ka resolution bad ong, “Ka jingmut jingpyrkhat jong nga ka long ka ban ïatei. Nga kwah ban ong khublei shibun ïa u Myntri Rangbah. Ka jingïakren mynta ka sngi ka pyni ïa ka jingïakut jingmut lang bad ka jingthmu ban nang wanrah ïa ka jingsngew kitkhlieh halor kane ka mat ba kongsan”.
U Mukul u la ïaroh ïa ka jinglong ba kloi ka Sorkar ban ïatrei ryngkat ryngkat lang bad ong, “Ngi phaikhmat sha baroh kita ki lad ïatreilang”.
