Imphal, Rymphang:
Ka jingïatreilang jong ki pulit bad ka kynhun pahara kaba dang bteng ha kylleng ka jylla Manipur ha ka 18 tarik u Rymphang ka la ïoh ban kem sa ïa lai ngut ki dkhot jong ki kynhun kieng atiar kiba la shah ñiew beaiñ bad ki la ïoh ruh ban kurup ïa kiba bun ki tiar ïasiat bad ki tiar pynbthei ha kiba bun ki distrik.
Ki pulit ki la ïathuh ba uwei u lehnoh ba 53 snem ka rta uba don jingïadei bad ka kynhun RPF/PLA u la shahkem na ki thaiñ Khangabok kiba hap hapoh jong ka Thoubal police station ha Thoubal district.
Ka jingkhynra ba kyrpang ha Imphal West district ka la pynlong ïa ka jingkem ïa uwei u dkhot jong ka kynhun lehnoh UNLF (Koireng) uba la 37 snem ka rta na ka ïing sah jong u kaba don ha Lamlongei Maning Leikai.
Uwei pat uba la shah kynnoh ba u dei u dkhot jong ka KCP (PWG) uba la 34 snem ka rta, une u la shah kem na Singjamei Chinga Makha kaba hap hapoh thanat Singjamei ha Imphal West district.
Ki shipai pahara ha ka jylla ki la kem ïa san ngut ki dkhot jong ki kynhun kieng atiar bapher bapher bad ïa u suba nongkhaïi drok, ha kine ki khyndiat sngi ba la bteng ka jingleit khynra.
Ha kane ka jingpyntreikam la ïoh ban kurup ïa u drok Heroin da 400 gram bad ki tiar siat ha ryngkat ki kuli.
Ha ka 15 tarik u Rymphang ki bor pahara ki la kem ïa u Md. Jayad Khan uba 42 snem ka rta na Sangaiyumpham Part-II Cherapur kaba hap hapoh ka jingkhmih jong ki pulit ka Thoubal.
Kum shi bynta ban leh ei ei hadien ka jingïoh jingtip na ki kynhun wadbniah, ki shipai ki la pynlong ïa ka jingleit khynra ha ka ïingsah jong u bad ïoh ban kurup 10 tylli ki synduk sabon ba la thep ïa u drok Heroin No. 4 uba don ïa ka jingkhia kumba 397 gram.
Ha ka 16 tarik u Rymphang, ki bor pahara ki la kem ïa uwei u dkhot jong ka kynhun ba la shah ñiew beaiñ ka Kangleipak Communist Party (Noyon faction) na ka thaiñ Sawombung kaba hap hapoh Lamlai Police Station ha Imphal East district.
Une uba la shah kem u dei uba la tip kyrteng kum u Phijam Rainson Singh ba la tip ruh da ka kyrteng kum u Luwangcha, Amutombi, Tayai (29) uba shong ba sah ha Pungdongbam Mayai Leikai kaba don ha Imphal East.
Ha kajuh ka por, ha ka 15 tarik, ki bor pahara ki la ïoh kem ïa arngut ki dkhot jong ka kynhun Kanglei Yawol Kanna Lup (KYKL) na ka thaiñ Jagnoi kaba hajan u IMB pillar No. 80 ha Moreh kaba hap hapoh ka jingkhmih jong ki pulit ka Moreh, kaba don ha Tengnoupal distrik.
Hashwa kane, ki bor pahara ki la kem ïa arngut ki kynthei kiba dei ki dkhot jong ka kynhun kaba la shah ñiew beaiñ ha ki jingkhynra ba kyrpang ba la pynlong ha kylleng ka jylla Manipur ha ka 15 tarik u Rymphang.
Ha ka jingkhynra kaba nyngkong, kawei ka briew kaba la shah kynnoh ba ka donkti ha ki kam dawa pisa bad ka kynhun lehnoh United National Liberation Front (UNLF-Koireng) ka la shahkem na Nongpok Inkhol, kaba don ha ka thaiñ New Checkon kaba hap hapoh Porompat Police Station ha Imphal East District.
Kane kaba la shahkem ka dei kaba la tip kyrteng kum ka Salam (N) Sanasam, ba la tip ruh da ka kyrteng kum ka Santikumari Devi (29), kaba dei ka nongshong shnong jong ka Upokpi Mamang Leikai ha Bishnupur distrik.
Katkum ki tyllong khubor ba la wan na ka kynhun pahara, la ong ba kane ka briew, ka la donkti ha kiba bun ki kam dawa pisa jong kane ka seng.
Ha ka por ba ka la shahkem, ki bor pahara ki la ïoh ban kurup ïa ar tylli ki Mobile phone bad kawei ka Aadhaar card na ka.
Ki bor pahara ki la khmih bniah ïa ki tiar ba la ïoh kurup bad bteng ïa ka jingtohkit khnang ban lah ban lap dien shuh shuh.
Ha ka jingkhynra ba kyrpang kaba la pynlong ha katei kajuh ka sngi, ki bor pahara ki la kem sa kawei pat ka briew kaba trei shitom jong ka kynhun lehnoh ba la shah ñiew beaiñ ka Kangleipak Communist Party (KCP-Apunba).
Kane kaba la shahkem ka dei kaba la tip kyrteng kum ka Mutum Joshika Chanu (19), kaba la tip ruh da ka kyrteng kum ka “Maikeingakpi.”
La kem ïa ka na ka ïingsah jong ka ha Lamdeng Thongkhong kaba hap hapoh ka jingkhmih jong ki pulit ka Lamsang kaba don ha Imphal West district.
Ki bor pynïaid ki la pynpaw ba ka jingtohkit ka dang ïaid shakhmat ban pynthikna ïa ka bynta bad ka jingdonkti jong ka ha ki kam jong ka kynhun lehnoh.
