Shillong, Rymphang 19
U MP Voice of the People Party (VPP) na Shillong u Dr Ricky AJ Syngkon u la khlad kyndit ha ka janmiet jong ka sngi Palei ha Dr H Gordon Robert Hospital, Jaiaw. La ong ba la pynkit mar mar sha hospital hadien ba u la kyllon katba u dang ïalehkai phutbol ha madan kaba ha Mawlai Mawiong.
Katkum ka khubor ba ïoh, la ïathuh ba u Dr Ricky u la leit ïalehkai phutbol bad la ki jong ki paralok ha kane ka janmiet ha ka madan ïaleh-kai kaba don ha Mawlai Mawiong.
La ïathuh ba u Dr Ricky u la kyllon ha ka por ba ïalehkai bad mar mar, ki paralok kila pynkit noh ïa u sha Mawiong Community Health Centre (CHC) ban ïoh jingsumar, hynrei namar ka jingbym don doktor, la pynkynriah noh mar mar sha Dr H Gordon Robert Hospital.
Hadien ba la pynkit sha Dr H Gordon Robert Hospital bad tang hadien katto katne por ki bor hospital kila pynbna ba u Dr Ricky u la khlad noh na kane ka pyrthei ha ka por 8:42 baje janmiet.
Mar ïa ïoh ïa kane ka khubor kaba sngewsih, na ka liang ki heh Sorkar naduh u Myntri Rangbah ka Jylla u Conrad K Sangma, ki Symbud Myntri Rangbah Bah Prestone Tynsong, Bah Sniawbhalang Dhar, u Bah Ardent M Basaiawmoit, ki MLA bad MDC lem bad ki paidbah ki la wan hiar sha kane ka hospital ban pynpaw ka jingsngewlem.
Lah ban kdew hangne, u Dr Ricky u la jop ïa ka ilekshon MP kum u kyrtong ka VPP da kaba pynliem ïa u MP ka Congress Bah Vincent H Pala da haduh 3.7 lak vote ha u snem 2024.
