Nongpoh, Rymphang 19
Ha kawei ka jingïatyngkhuh kali ha ka step sngi Palei, uwei u khynnah skul jong ka Mount Zion Academy Byrnihat u la duh noh ïa la ka jingim katba bun ngut kiwei pat kila ngat ha ka jingmynsaw hadien ba ka bos skul kaba ki shong, kala shah tynrah nadien ha ka trok kaba kit ïa u maw Clinker.
Katkum ka tyllong khubor na ki bor pulit, la ïathuh ba kane ka jingjia ka dei ha ka por kumba 8:15 mynstep katba katei ka bos skul kaba don ïa u Registration Number ML10-D-5047 ka dang kit ïa ki khynnah skul ha ka surokbah National Highway 6 kaba hiar na Shillong sha nongbah Guwahati kaba dang hap ha ka shnong 17 Mer Pahamlang, Ri Bhoi District.
La ïathuh ba ha katei ka por, katei ka trok kaba kit ïa u maw clinker, kaba don ïa u Registration Number NL01-AA-4672 kala leit tynrah beit-beit nadien katei ka bos kat haduh ba ki bynta jong katei ka trok nakhmat bad nadien jong ka bos kila julor bad bun ngut ki khynnah skul ki la ngat ha ki jingmynsaw.
Shuh shuh, na ka liang ki pulit kila ïathuh ruh ba ha kane ka jingjia, uwei na ki khynnah skul, uba la tip kyrteng kum u Maxwell Lyngdoh na ka shnong 9 Mer Ri Bhoi District uba la mynsaw jur bad u la khlad noh hadien ba la pynkit sha Arhi Hospital, Jorabat.
Halor kane ka jingjia, na ka liang ki bor pulit kila shimkhia ban pynlong ïa ka jingtohkit bad ruh ban shim ïa ki sienjam katkum ki kyndon jong ka aiñ.
