Shillong, Rymphang 19
Ka lympung ïalehkai 5th District League T20 Cricket Tournament 2026 ba la pynïaid da ka East Khasi Hills Cricket Association ka la nangjam shaphrang ha kaba ka Mawphlang CC bad ka Laitkynsew Mission Club ki la khur jingjop ha ka sngi Palei.
Ha kane ka jingïakhun kaba la long ha madan Pynshadkhurai kaba ha Saitsohpen Sohra, ka Laitkynsew ka la pynliem noh ïa ka Seng Samla Mawlong Mawriang da 28 run. Ka Laitkynsew kaba la jied ban tied nyngkong, ka la kamai 182 run bad shah shah pynhap 8 wiket ha ki 20 over. U Mebanrikupar Malngiang u la long u nongtied uba la ïoh bun da kaba u la khyrwit 73 run na ki 35 bol. Katba u Stevintinison Lynrah u la khur 3 wiket na ka bynta ka SSM Mawriang.
Haba wan beh ïa ka thong, ki nongtied ka SSM Mawriang ki la shah pynkhyllem baroh bad kamai tang 154 run ha ki 17:5 over. U Rahul Bhimsubro u la tied ïa ka shiteng spah kaba 64 run na ki 32 bol. Katba u Mebanrikupar Malngiang u la khur 3 wiket na ka bynta ka Laitkynsew Mission bad u la khur ruh ïa ka nam Player of the Match.
Haba phai sha kawei pat ka jingïakhun kaba ar, ka Mawphlang CC ka la jop da 6 wiket ïa ka Royal Rangers CC. Ka Royal Rangers kaba la kam trai ban tied nyngkong ka la kamai 132 run bad shah pynhap 6 wiket ha ki 20 over. U Lalaplad Tariang u la tied 31 run na ki 21 bol. Katba u Janai u la khur 2 wiket na ka bynta ka Mawphlang.
Ka Mawphlang ka la lah ban kynjoh sha ka thong ha ka jingwan shimti ïa ka pali kaba ar da kaba kamai 133 run bad shah pynhap 4 wiket ha ki 17 over. U Janai u la khyrwit ïa ka shiteng spah kaba 63 run na ki 53 bol bad ban ïoh ruh ïa ka ka nam Player of the Match. Katba u Balabianglang Buhphang u la khur 4 wiket.
Ka jingïalehkai ha ka sngi Thohdieng kan long hapdeng ka Friends United pyrshah ïa ka Naya Basti ha ka por 8:30 mynstep, katba ka Pomshutia ïa ka Royal Challengers Mawsynram ha ka por 12:05 mynsngi.
