Shillong, Rymphang 19
U Bah Powell Sohkhlet Executive Member (EM) ba dei khmih ïa ka tnad khyndew (Land) u la pyntip ba ki Dorbar Shnong kim donbor ban ai wai ïa ki jaka jong ki Shnong ne ki Raid sha ka Sorkar ne ki kompeni khlem ka jingbit na ka District Council.
Ïa kane u Bah Powell u la pyntip haba jubab ïa ka jingkylli ba la wanrah da u MDC ka Laban Constituency u Bah Ricky Shullai hapoh Ïingdorbar.
Haba jubab ïa ka jingkylli u EM u la ïathuh ba ki Dorbar Shnong katkum ka Khasi Hills Autonomous District Council Land Act ki donkam ban ïoh ka No Objection Certificate (NOC) na ka District Council ha shuwa ban ai wai ïa ki jaka jong ki shnong ne ki Raid sha ka Sorkar lane Kompeni.
U EM u la kubur ba ka Executive Committee ka la ïoh pdiang jingujor haba ïadei ka jingaiwai ki Dorbar Shnong ïa ki jaka jong ki shnong ne jong ki Raid sha ka Sorkar lane sha ki kompeni.
Shuh-shuh u la ong haba ïadei kane, ka District Council ka la khot bad pan jingpynshai na kum kita ki Dorbar Shnong, hynrei ka District Council kam lah ban pynshitom ïa ki namar ha ka Khasi Hills Autonomous District Council Land Act, kam shym la don kano-kano ka kyndon ban ai bor ïa ka District Council ban pynshitom ïa ki Dorbar Shnong ba ïaid lait ïa ka Act.
U EM u la pyntip ba ka EC kan sa bishar ïa ka Khasi Hills Autonomous District Council Land Act ban wad ki lad ki lynti ban bsuh ïa ki kyndon aiñ khnang ban pynïohbor ïa ka District Council ban pynshitom ïa ki Dorbar Shnong ba aiwai jaka khlem ka jingbit na ka Council.
