New Delhi, Rymphang:
Ka Supreme Court ha ka sngi Balang ka la kyntait ban ai jamin lypa ïa u Chartered Accountant ha ka jingtohkit halor ka jinglum pisa da ka lynti kaba beaiñ kaba ïadei bad ka kam thok pisa kaba la kot sha ka T.640 klur. Ka kynhun nongbishar jong u Justice MM Sundresh bad u Justice Augustine George Masih ki la pynskhem ïa ka hukum jong ka Delhi High Court kaba la kyntait ban ai jamin shuwa ban shah kem ïa u Bhaskar Yadav bad bthah ïa u ba un pyndem noh ïalade haki shiphew sngi.
Ka SC ka la kyntait ban ai jamin ïa u Bhaskar Yadav ha kaba ïadei bad ka jingkamai thok ïa ka pisa kaba T. 640 klur lynba ka Cyber bad ka jingkamai pisa da ki lynti beaiñ, ha kaba la donkti lang da ki nongthep pisa kiba heh spah lyngba palat 5,000 tylli ki Bank Accounts bad ka jingbam tyngka lyngba ki kynhun na UAE.
Ka High Court ha ka 2 tarik Rymphang, ka la weng noh ïa ki jingpan jamin ba la buh lypa jong u Yadav bad u Ashok Kumar Sharma. Ha katei ka jingbishar kaba 22 sla, ka ïingbishar ba hakhlieh duh, ka la ong ba ka don ka “jingpyrkhat kaba jylliew bha jong ka jingkamai thok ïa ka pisa”, bad ka jingdonkam ba la pynpaw da ka Enforcement Directorate ban tohkit ïa ki arngut kiba shah kynnoh kiba don ha phatok, kam dei kaba khlem nongrim.
“Kine kiba shah kynnoh/ bad ki nongaply, namar ba ki dei ki riew shemphang kiba tbit, la kynnoh ba ki la shna ïa ka buit ban ïaid da ka lynti kaba beaiñ ha ka ban kamai spah bad ban lap ïa kajuh, nga shem ïa ka jingmut ha ka jingai jingmut jong ki nongïasaid aiñ ba la nang la stad na ka bynta ka DoE (Directorate of Enforcement) ba ka jingtohkit ha ka jingshah set phatok ka long kaba donkam bha,” la ong ka HC.
“Kam dei ka mukotduma jong ka jingïadei tang ha ka rukom pynïaid ïa ka pisa, kaba halade kam dei ka kam runar ha kane ka ri bad ka jingkitkhlieh jong ki briew ba shah kynnoh ka long tang ha kaba siew khajna ïa ki jingpynïaid ïa ka pisa. Ki mukotduma ba mynta ki pyni ïa ka jingïaid lynti kaba heh bha jong ka jingïaid lynti jong ka pisa, la sei da kaba thok na ka pla jong ki nongbei tyngka kiba shu biang ka jingïoh. ,” ka la bynrap.
Ka ïingbishar ba hakhlieh duh ka la pynpaw ba ka jinglaitluid jong uwei pa uwei ka long kaba kyntang, hynrei kam lah ban pynduh ïa ka jingbthah ban pynlong ïa ka jingtohkit bad ka jingtohkit kaba don jingmut na ka bynta ka jingmyntoi kaba kham heh jong ka ïoh ka kot jong ka ri. Ka la kdew ba ki don ki jingujor bathymmai pyrshah ïa kiba shah kynnoh ba ki la thombor pyrshah ïa ki heh nongtohkit, pynbam tyngka ïa ki pulit khnang ban lah ban pynbiang ïa ki jingduna jong ki Cyber bad ka jingpynduh pyndam ïa ki sakhi kiba wan ha ki kor ilektronik.
Ka jingtohkit halor ka jingpynkylla pisa ka mih na ki ar tylli ki jingujor ejahar ba la mudui da ka Economic Offences Wing (EOW) jong ki pulit ka Delhi kiba la mudui ban tohkit ïa ki jingshah kynnoh thok ha ka Cyber haduh T.640 klur tyngka ba la ïoh lyngba ka jingïathong, ka jingïakhalai, ki kam part-time bad ki jingbam sap, la ong ka kynhun ED hashwa ha ka jingthoh ba la phah. Katkum ka jingong jong ka tnad, ïa ka pisa jong ki briew kiba sngewrit la shim kabu da kaba buh ïa ki pisa ba la thok na ki lyngba palat 5,000 tylli ki Bank Account jong ka ri India bad hadien kata la buh ha ka PYYPL, ka jaka siew pisa kaba don ha UAE.
Shi bynta jong ka pisa thok na Cyber la sei da ka pisa ha Dubai lyngba ki debit bad credit card ba la ai da ki bank bapher bapher jong ka ri India, la ong ka khubor.
