Shillong, Rymphang 19
U Working President ka Khun Hynñiewtrep National Awakening Movement (KHNAM) u Bah Thomas Passah u la kynnoh ba u Myntri Rangbah ka Jylla, u Conrad K Sangma u la ïalam bakla ïa ka Ïingdorbar baroh kawei kalor ka jingïatai nia ha kaba ïadei bad ka mat Inner Line Permit (ILP).
Haba kren sha ki lad pathai khubor ha ka 19 tarik u Rymphang 2026 , u Bah Thomas Passah u la ong ba ka ILP ka dei kawei ka mat kaba ka seng ka la buh ïa ka thup kaba hakhmat ban pynurlong ïa ki jingdawa hapoh ka Jylla. “Ka Seng ka dawa ïa ka ILP hynrei u Conrad u wanrah pynban ïa ka mat ha Ïingdorbar da ka Immigration and Foreigners Act.
Shuh shuh u la ong ba ka seng ka kwah ban ïada ïa ka jaitbynbiew na u bar jylla, hynrei ka Sorkar pat ka wanrah pynban ïa ka mat ban ïada na u bar ri.
U la ban jur ruh halor ka jingkren kaba wan na ka Sorkar Pdeng ha u snem ba la dep ban kynthup ‘Protected Area’ ïa ka Jylla Meghalaya, Sikkim , Arunachal Pradesh, Mizoram, Nagaland, bad ka Manipur, hynrei u la ong ba ka Meghalaya kam pat ïoh ïa ka ILP ba pura kumno ka lah ban long ba kan shah kynthup ha ka ‘Protected Area’.
U Bah Thomas u la buh jingkylli ruh ïa u Myntri Rangbah ka Jylla, ba haba ka Jylla Manipur, Nagaland, Arunachal Pradesh bad ka Mizoram ki ïoh ïa ka ILP balei ka Jylla Meghalaya pat kam shym la ïoh haduh mynta?. Ngi hap ha ka juh ka riti synshar bad lada ka riti synshar ka ai ïa ka ILP sha kiwei ki Jylla balei ka Jylla Meghalaya pat ka shym la ïoh?
Namarkata, u la ong ba kane ka dei beit ka jingibeiñ nyngkong eh jong ka Sorkar Pdeng bad ka jingbym lah jong ka Sorkar Jylla ban ïatai bad ban pynbor ïa ka Sorkar Pdeng ba kan ai ïa ka ILP hapoh ka Jylla Meghalaya.
