Shillong, Rymphang 19
U Myntri Rangbah ka Jylla u Conrad K Sangma u la pynpaw ka jingsngewkyndit haba u dang pynkhreh ïa ka mang tyngka ban wanrah lashai ka sngi ha ïingdorbar hynrei u ïoh khubor ba u Dr. Ricky Syngkon, MP ka Lok Sabha u la kyllon haba u dang ïalehkai phutbol hynrei um poi pyrkhat ba un khlad nangne na sla pyrthei.
Kane ka jingpynpaw u Conrad Sangma ka dei haba u la poi ban leit sngewlem ïa ka jing-khlad u Dr. Ricky ha Dr. H Gordon Robert Hos-pital, Shillong ha ka janmiet jong ka sngi Palei ha ka por 9:00 baje eiei hadien ba u la mih na katei ka hospital.
U la ong ba ka jingkhlad noh u Dr. Ricky Syngkon ka long ka jingduhnong kaba khraw ïa ka jylla khamtam ïa ka ri Khasi bad Jaiñtia namar u dei u briew uba trei shitom.
Kumta u la phah ka khubor sngewlem sha kiba haïing hasem, ki nongkitkam, ki nongkyrshan ka VPP ïa ka jingkhlad noh u Dr. Ricky Syngkon.
U la pyntip ruh ba lashai ka sngi kin sa shong jingïalang ha kaba yn pynïaid da u Lamphang ban ïakren ban pynsangeh noh ïa ka dorbar lashai kum ka jingburom ïa u Dr. Ricky, uba la khlad noh na kane ka sla pyrthei.
Katba u Symbud Myntri Rangbah Bah Prestone Tynsong u la phah ka jingsngewlem ba U Blei un ai ka jingjahthait ïa u Dr. Ricky Syngkon ban ai jingpyntngen ïa kiba haïing.
U Bah Prestone u la ong ba ha ka jingïakynduh lashai kin sa ïakren ban pynsangeh noh ïa ka dorbar mangtyngka.
