Shillong, Rymphang 19
Ka lympung ïalehkai Assam Rifles Sentinels Football Cup 2026 ba la pynlong da kane ka kynhun shipai ka la jam sha ka sngi kaba lai, ha kaba ka Rangdajied United FC bad ka Assam Rifles FT ki la khur jingjop ha ka liang ki kynthei, katba ka Smit SC bad ka Shillong Police FT ki la jop ha ka liang ki shynrang.
Ha ka jingïakhun jong ki kynthei kaba la long ha madan Nongkrem ha ka sngi Palei, ka Rangdajied United ka la pynliem noh ïa ka Kharang SC da 6-1 kol, katba ka Assam Rifles ka la jop haduh 12-0 kol ïa ka Mawshbuit SC.
Kumba ka long mynta ka Assam Rifles ka la thikna ban jam semi final namar ka la jop ar sien na ka bynta ban lamkhmat ha ka Pool-A bad ha ka jingïalehkai kaba nyngkong ka la jop da 5-0 kol ïa ka Laitkor. Te kumta kane ka kynhun kan pynkhreh ïa ka jingïalehkai kaba khatduh pyrshah ïa ka PFR Football Academy ha ka 21 tarik.
Haba phai sha ka jingïalehkai ki shynrang kaba la long ha madan jong ka Assam Rifles, ka Smit SC ka la pynliem noh ïa ka Little Stars Academy da 1-0 kol bad ka Shillong Police FT ka la jop da 5-3 kol ïa ka Thynroit SC.
