Lucknow, Rymphang:
Katto katne ki skul ha kylleng ka Noida ki la shah pyntieng pynsyier ha ka sngi Palei hadien ba ki la ïoh ïa ki email ba byrngem ban shah pynbthei bom, kaba la pynlong ïa ki bor synshar ban pyntreikam kyrkieh.
Kane ka khubor byrngem ka la wan ha ka por kaba khia namar ka jingdon jong ki eksamin board jong ka CBSE kiba dang ïaid shakhmat, kaba la pynjur ïa ka jingsngewkhia hapdeng ki kmie ki kpa bad ki bor pynïaid skul.
Ki kynhun pulit ki la poi sha ki skul tang hadien ba la pyntip ïa ki jingpynbna.
La pynbor ïa ki kynhun pynduhbor ïa ki bom bad ki kynhun jong ki ksew sma dien ban treikam, bad ki heh sorkar ki la sdang ban talasi bniah ïa ki kamra klas, ki lynti ïaid bad ki jaka ba plie hapoh ki jaka pule.
La pynkynriah noh ïa ki samla pule bad ki nongtrei na ki kamra klas bad na ki jaka ba ki don bad pynshong ha ka jaka kaba don jingshngaiñ, katba ki shipai ki dang pynlong ïa ka jingkhmih bniah.
Ki heh ba dei khmih, ki la ong ba kine ki jingbyrngem ki la wan lyngba ka Email.
Kum ka lad jingïada, ki nongpynïaid skul ki la pynsangeh ïa ki kam ba man ka sngi bad ki la buh hakhmat eh ïa ka jingpynkynriah jaka.
Ki nonghikai ki la ïalam ïa ki khynnah shabar da kaba jai jai khnang ban lait na ka jingtieng bad kiwei pat ki jingjia basngewsih, katba ki bor pynïaid skul ki la ïakynduh ïa ki kmie ki kpa bad ki nongri nongsumar halor kane ka jinglong jingman.
Ka por jong ki jingbyrngem ha ka por eksamin CBSE board ka la pynmih ïa ka jingsngewkhia kaba haduh katta katta, namar ba bun ki samla pule ki dang pynkhreh ban shong na ka bynta ban thoh eksam bad don ruh kiba la don ha ki kamra thoh eksam haba la wan ki khubor pyntriem.
Ki pulit ki la ïathuh ba la pynlong ïa ka jingpeit bniah kaba bniah bad, haduh mynta, ym pat lap ïa kaei kaei kaba shyrkhei na kano kano ka jaka pule. Ka jingwad bniah ka la bteng haduh katto katne kynta ban pynthikna ïa ka jingshngaiñ kaba pura shwa ban ailad ïa ka jingtreikam kaba man ka sngi ban sdang biang.
Ka jingwad bniah ïa ka tynrai jong ki email ka dang bteng haduh ba la thoh ïa ka khubor.
Ki riew shemphang ha ka cyber ki dang bishar ïa ki jingtip ba bniah ban ithuh ïa u nongphah bad ban tip la ki jingbyrngem ki dei kiba thok ne shi bynta jong ka jingpyrshang kaba kham jur ban pynmih ïa ka jingtieng jingsyier.
Ki heh sorkar ki la pynthikna sha ki kmie ki kpa bad ki bor pynïaid skul ba yn sa leh da kaba tyngeh ynda la ithuh ïa u briew uba donkti kum ha kine ki jait kam.
