Shillong, Rymphang 19
U Chief Executive Member (CEM) u Bah Winston Tony Lyngdoh haba jubab ïa ka jingkylli ba la wanrah da u MDC ka Laban Constituency u Bah Ricky Shullai, u la pyntip ba ki don haduh 46 tylli ki dukan lane kiba leh ki kam khaïi jong ki bar Jylla kiba treikam khlem da ïoh Trading License napoh ka District Council.
U CEM haba ïathuh ïa ki sienjam ba ka District Council ka la leh halor ki bar Jylla ba pynïaid dukan lane ki kam khaïi khlem da ïoh Trading License na KHADC, u la ïathuh ba ki don 3 tylli ki dukan kiba la shah khang ha ki thaiñ Laban, 4 tylli ki Travel Agency ba treikam ha Dhanketi kumjuh ka kompeni Blinkit ba treikam ha Fire Brigade ki la shah khang.
“Hadien ba la khang ïa ki 4 tylli ki Travel Agency ha Dhanketi, ka District Council ka la aiti ïa kine ki Agency sha ki trai ri trai muluk ban pynïaid” la ong u CEM.
U la ïathuh ba ka Executive Committee ka dang bishar bniah sa ïa kiwei ki dukan lane ki kam khaïi jong ki bar Jylla kiba treikam khlem da ïoh Trading License ha shuwa ban shim rai ban khang ïa ki bad lada kim lah ban pynbit pynbiang ïa ki kot ki sla ba donkam.
U Bah Winston u la pyntip ba ka EC ka la pynmih hukum ha ka 10 tarik Ïaiong 2025 sha baroh ki Dorbar Shnong ban bthah ba ki dei ban pyrkhing bad ban peit thuh ïa ki bar Jylla kiba thmu ban seng dukan ne kino-kino ki kam khaïi ha ki shnong ki thaw khlem da biang ïa ki kot ki sla ba donkam.
