Shillong, Rymphang 19
Ka Sporting CC ka la pynliem noh ïa ka Young Guns CC da 5 wiket na ka bynta ban khur ïa ka jingjop ha ka lympung ïalehkai Super Division Cricket League 2026 ba la pynïaid da ka Shillong Cricket Association (SCA) ha ka sngi Palei.
Kane ka jingjop ka la pynlong ïa ka Sporting ban bat ïa ka kyrdan ba-ar, hadien ba ka la ïaryngkat mar 6 poiñ bad ka Rangkynsai CC, kaba danglamkhmat ha ka Group-B jong kane ka lympung.
Haba phai sha kane ka jingïakhun kaba la long ha madan ïalehkai kriket jong ka MCA ha Polo, ka Young Guns ka la kam trai ba kan tied nyngkong ha kaba ka la kamai 117 run bad shah pynkhyllem, baroh ki nongtied ha ki 29.1 over. U Manthan Dey u la tied 27 run na ki 35 bol bad u Angkit Tamang u la ïoh 24 run na ki 38 bol. Katba u Sachin Kumar bad u Purav Agarwal ki la khur mar 3 wiket na ka bynta ka Sporting.
Haba wan wan shimti ïa ka pali kaba ar, ka Sporting ka la lah ban kynjoh sha ka thong da kaba kamai 120 bad shah pynhap 5 wiket ha ki 17.5 over. U Rohit Kumar Yadav u la tied 39 run na ki 33 bol bad u Avinash Rai u la ïoh 33 run na ki 42 bol. Katba u Grish Raj Ray bad u Mewankitbok Kharpuri ki la khur mar 2 wiket na ka bynta ka Young Guns. Ïa ka nam Player of the Match la khur da u Sachin Kumar.
Ka jingïalehkai jong ka Group-A ha ka sngi Thohdieng kan long hapdeng ka Royal CC pyrshah ïa ka Nongmynsong CC naduh ka por 8:30 mynstep.
