Shillong, Rymphang 19
Ka kapten jong ka India, ka Harmanpreet Kaur ka la lah ban buh ïa ka kyrteng jong ka ha ka khana sah kynmaw, ha ka sngi Palei, ha kaba ka la long ka nongïalehkai kaba la lah ban pynpaw ïa ka jingtbit ha ki jingïa-lehkai kriket bar ri jong ki kynthei, ha ka T20I kaba ar pyrshah ïa ka Australia kaba la long ha Manuka Oval.
Kane ka jingïaid lynti ka la long kaba 356 sien na ka bynta ka Kaur ïa ka ri India ha ki jingïalehkai bar ri, kaba la pynlong ïa ka ban tam ïa ka rekod kaba mynshwa kaba 355 tylli ki jingïalehkai ba la bat da ka nongïalehkai ba paw ka New Zealand, ka Suzie Bates.
Lyngba kane ka rekod, ka Kaur mynta ka la lamkhmat ïa ka thup jong baroh ki nongïa-lehkai ka pyrthei ha ka jingïalehkai kriket jong ki kynthei, hakhmat ïa ka Bates, ka Ellyse Perry na Australia (349 sien), bad ka kapten barim ka India ka Mithali Raj (333 sien). Ka Charlotte Edwards jong ka England, ka la don ha ka thup kaba san bad 309 sien.
Ka Kaur, kaba la mih madan nyngkong eh ha ki lympung ïalehkai bar ri ha u snem 2009, ka la lah ban ngam jylliew ha ka kam ïalehkai jong ka ha baroh lai tylli ki jingïalehkai. Ka rekod jong ka, ka kynthup ïa hynriew tylli ha ka Test, 161 tylli ha ka ODI bad 189 tylli ha ka T20I, ha kaba ka jingïaid lynti ha ka kam ïalehkai ka dei ka sien kaba 189 ha ka T20I.
Ka jingjop kaba khatduh jong ka Kaur ka pyni ïa ka jinglong nongïalam na ka bynta ban kynjoh sha ka thong. Ka la ïalam ïa ka India sha ka jingjop ba nyngkong jong ka ha ka ODI World Cup ha u snem 2025 bad dang shen ka la khmih lynti ïa ka jingjop ha ka T20I ha England. Ha kaba sdang jong une u bnai, la pynkup burom ruh ïa ka da ka khusnam Padma Shri halor ka jingnoh synñiang ba radbah jong ka ha ka jingïalehkai kriket jong ka ri.
