Shillong, Rymphang 19
Ki Executive Member jong ka Shnong Mawrapad hapoh ka jingïalam u Bah Kyrmenskhem Shangdiar Rangbah Shnong, ki la wan ban pynshai paidbah halor ka jingshah kynnoh ba la leh donbor da u Rangbah Shnong ban pynkynriah ïa ka skul sha ka Community Hall.
Haba kren sha ki lad pathai khubor ha ka nohphai sngi jong ka 19 tarik u Rymphang 2026, ha Shillong Press Club, u Bah Kyrmenskhem Shangdiar u la ïathuh ba ka jingwan thad jong ki nongshong shnong ka long kaba bakla, namar ïa ka skul shnong ym shym la pynkynriah donbor da ma u shimet, hynrei la pynkynriah katkum ka jingïa mynjur lang da ka Dorbar.
U la ïathuh ba ka daw ba la pynkynriah noh ïa ka skul sha Community Hall ka dei namar ba ka skul kam long shuh kaba bha bad ka la jot rathai palat, khamtam ki khynnah skul ki la mad ka jingeh ha ka por slap. Kumta la pynkynriah noh ïa katei ka skul khnang ba ki khynnah kin ïoh ïa ka jaka kaba biang.
Halor ka jingkynnoh jong ki nongshong shnong dangshen, ba naduh ba la pynkynriah ïa katei ka skul sha Community Hall, ki khynnah kim ïoh shuh ka jingïarap ha ka liang ka Midday Meal bad ki kot skul ruh, na ka liang u Bah Kyrmenskhem u la ong ba haduh mynta ki khynnah ki ïoh lut naduh ki kot skul bad ka Midday Meal ruh ki dangïoh ym kumba la kynthoh.
“Haduh mynta kam shym la don kano-kano ka jingsyier ne jingma hapoh shnong poh thaw kumba la shah kynthoh hynrei ngi shongsuk. Ha ka sngi ba ki nongshong shnong ki wan ban kynthoh baroh ki dkhot ka Dorbar Shnong ki la long kumba ïuh tdong bseiñ,” u la ong.
Haba kylli, u Bah Kyrmenskhem u la ong “Ngim pdiang satia halor ka jingkynnoh ba u la bamsap ïa ka pisa halor katei ka skul, da kaba bynrap ruh ba wat ju kren khlem ka jingpynshisha ïoh ka kyrtoh kylla sha lade”.
Na ka liang u Bah Poming Kharlyngdoh, Rangbah Shnong barim ka Mawrapad u la pynrem jur ïa ka jingwan thad jong ki nongshong shnong.
Shuh shuh u ong ba u Rangbah Shnong haba u leh ïa kano-kano ka kam um ju leh marwei hynrei u leh da ka jingïatip lang baroh ki Executive Member ka Dorbar, hynrei kane ka jingwan thad jong kine ki nongshong shnong lehse ka don eiei sha lyndet kaba ym lah ban tip.
