Shillong, Rymphang 19
Ka kynhun ki rangïalehkai Under-17 ka ri India kan pynkhreh ïa ki ar tylli ki jingïalehkai paralok pyrshah ïa ka Myanmar ha Yangon ha ka 3 bad 5 tarik u Lber.
Kane ka kynhun ïalehkai ka ri, kaba dangdon ha ka jingpynkhreh na ka bynta ka AFC U17 Asian Cup Saudi Arabia 2026, ka la dep ban ïalehkai saw sien shabar ri mynta u snem, kata ar sien pyrshah ïa ka Tajikistan ha Goa bad ïa ka Türkiye ha Antalya.
Hadien ba ka la wanphai na Türkiye, kane ka kynhun hapoh ka jingïalam u Bibiano Fernandes ka la bteng ïa ka jingkilanmet ha Goa. Te kumta kane ka kynhun kan mih ban leit sha Myanmar ha ka 28 tarik mynta u bnai.
Kumba ka long ka India, ka Myanmar ruh ka la ïoh rung sha ka AFC U17 Asian Cup. Ka la ïoh ban lamkhmat ha ka Group-C jong ka lympung ïaknieh rung, ha kaba ka la wan hakhmat ïa ka Oman, Syria, Afghanistan bad ka Nepal.
Te kumta ka India ha katei ka lympung jong ka AFC U17 Asian Cup Saudi Arabia 2026 kan ïakhun nyngkong jong ka Group-D pyrshah ïa ka Australia ha ka 6 tarik u Jymmang, kumjuh ïa ka Uzbekistan ha ka 10 tarik bad ïa ka DPR Korea ha ka 13 tarik.
