Shillong, Rymphang 20
U Myntri Rangbah ka Jylla Conrad K Sangma ha ka sngi Palei u la pyntip ha ïingdorbar ba haduh 817 tylli ki shnong bad 427 tylli ki kyntoit la register hapoh ka Meghalaya Residents Safety and Security Act (MRSSA), 2016 bad kane ka kam ka dang ïaid shaid shaid.
“Ka bynta kaba ar, kaba dei ka jingpynrung kyrteng bad peit thuh ïa ki briew kiba wan sha Jylla, kane ka bynta kan nang bteng. Nga lah ban kular ïa ka ïing,” ong u Conrad haba jubab ïa ka resolution ba la wanrah da u Nongïalam ka Liang Pyrshah.
U la pynsngew ïa ka jingïaid ki kam naduh u snem 2018, haba pyntip ba ka Sorkar kala sdang pyntreikam ïa ka Act bad kala pynïeng ïa ki facilitation centre (lane entry-exit point), hynrei la mad jingeh haba ka ïingbishar kala pynduh ïa ka.
U Conrad u la ban jur ïa ka jingdonkam ka jingïapyrshang lang da kaba ong “Kane kan jia tang lada ngi baroh ngi ïatreilang. Baroh kin hap ban ïapyrshang lang”.
U la pynpaw ba ka jingpynrung ïa ki shnong ha ka MRSSA ka dei ka kam kaba bun bah khamtam ba ka Jylla ka don ïa palat 7000 tylli ki shnong bala dep lum thup.
U Myntri Rangbah u la kular ba ka kam kala ïaid shakhmat ryngkat ka jingthmu ban pynïar ïa ka jingpynrung kyrteng ïa ki shnong sha kiwei-kiwei ki bynta jong ka Jylla.
