Shillong, Rymphang 20
Ka Chief Adviser jong ka Sorkar MDA kaba dei ruh ka nongthaw aiñ ka NPP na East-Shillong, ka Dr. M. Ampareen Lyng-doh ka la ai burom ïa u MP ka Shillong ba la khlad noh, u Dr. Ricky A.J. Syngkon, da kaba kyntu ïa ki ‘riewsaiñ pyrthei ban bud ïa ka nuksa jong u.
“Lada ngi kwah ban burom bad kynmaw ïa u, to ai ba ka saiñ pyrthei kan ym long ka rynsan jong ka jingïa-isih hynrei jong ki jingai jingmut bad ka jingshakri. Ki jingïapher kin don beit, hynrei kin ym kah dum ïa ka jingkitkhlieh ba ïasam lang jong ngi,” ong ka Dr. Lyngdoh haba ïashim bynta ha ka ‘Obituary Reference’.
“Ngi ïeng mynta kum ka jingkynmaw burom ïa u (L) Dr. Ricky. Ka jingkhlad noh bym pat dei por jong u ka la wanrah ïa ka jingsngewsih ym tang ïa kane ka Ïingdorbar hynrei ïa ki paidbah nongshong shnong ka Meghalaya kiba baroh ngi shakri,” ka la ong.
Ka Dr. Lyngdoh ka la pynpaw ruh ïa ka jingaiti lut jong u Dr. Syngkon ban shakri, da kaba ong, “Watla u Dr. Syngkon bad ma nga, ngi dei na ki liang kiba ïapher, hynrei ki khyllipmat kiba kum kine ki pynkynmaw ïa ngi ba shabar jong ka jingïapher jong ngi, ngi ïasam ïa kajuh ka jingthmu…ha u snem 2024, u Dr. Ricky bad ma nga ngi la ïeng ha ki liang mar pyrshah, ngi la ïatai bad ngi la pan ïa ka jingshaniah jong ki juh ki briew. Watla katta ruh, nga ju kynmaw beit ba wat ha ka jingkhluit jong ka jingïalap, kam shym la don kata ka ban kynthoh shimet.”
Shuh shuh ka la ai jingïaroh ïa ka jinglong ba kitkhia jong u Dr. Syngkon da kaba ong, “Ka jingdon jong u ha Lok Sabha ka long ka jingpynshisha ba ka saiñpyrthei kaba paka tam ka dei shaphang ka jingshakri…ngi sngewsih ïa ka jingduh noh ym tang ïa u nongmihkhmat paidbah bad u paralok, hynrei u Khun jong ka Meghalaya.”
