Shillong, Rymphang 20
U MLA ka North Shillong Constituency u Bah Adelbert Nongrum u la phah ïa ka khubor sngewlem sha ki bahaïing hasem jong u Dr. Ricky A. J. Syngkon uba la khlad noh na kane ka sla pyrthei ha ka janmiet jong ka 19 tarik Rymphang 2026 ha Dr. H. Gordon Roberts Hospital Shillong.
U Bah Adelbert Nongrum haba kren sha ki nongthoh khubor u la ïathuh hadien ba u la ïoh ïa ka khubor ba la khlad u Dr. Ricky, u la kut jingmut ban ym leit sha Ïingdorbar Thawaiñ namar ka long ka jingduh kaba khraw ïa ka Voice of the People Party (VPP), hynrei haba u la ïoh jingtip ba ha Ïingdorbar kin shim kyrpang ban pynpaw lang ïa ka jingsngewlem hapoh ka Dorbar bad ban pynsangeh noh ïa kiwei pat ki mat, u Bah Adelbert u la shim ïa ka rai ban leit sha Dorbar ban pynpaw ïa ka jingduh kaba khraw jong ka Jaitbynriew bad ka Jylla.
U Bah Adelbert u la ïathuh ruh ba hynnin ka sngi mar ïa ïoh jingtip ba u Dr. Ricky um don shuh ha kane ka sla pyrthei ka long ka jingkyndit kaba khraw ïa u, namar u Dr. Ricky u dei u briew uba koit ba khiah, lyngba ka jingïohi ha kaba paw shabar. “Ha kato ka khyllipmat ba nga ïoh jingtip ïa kane ka khubor nga la dem khohsiew ban duwai bad aiti ïa ka mynsiem ka jong u Dr. Ricky sha u Blei uba thaw bad u Blei u ba la shim noh,” u la ong.
“Nga sngewkit ram ba ngam lah ban don lang ha kato ka por namar ba nga don shabar jong ka nongbah Shillong,” u la bynrap.
“Ka jingim jong une u nongïalam uba ngi la duh ka long ka jingkyrmen na ka bynta jong ngi watla u long tang marwei hapoh ka Parliament, une u nongïalam u la rah ïa ki mat kiba dei bad ka jaitbynriew, ha kane ka por kaba lyngkot ka pynkynmaw ïa ngi ki briew ba ka jingim kam dei ba ngi ñiew ïa ka rta, hynrei kaba ngi hap ban kylli kaba katno ka rta jong ka jingim bad kaba kumno kaba ngi im,” la bynrap u Bah Adelbert.
“Nga sngewtynnad bad ainguh ïa u Blei ba u la ai ha ngi ïa u Dr. Ricky A. J. Syngkon uba mynta u la leit noh na ngi, bad un ym iehnoh thylli ïa ka jaka, un duwai bad ïasaid namar ka jingdonkam jong ka jaitbynriew ka long kaba donkam,” u la ong.
U la bynrap da kaba ong ba ka jaitbynriew ka dang donkam ïa u Dr. Ricky, hynrei “Ngim lah ban buh jingkylli ïa u Blei namar u tip khambha ïa kiei kiei baroh bad ngi ngeit ba un ai ïa kaba bha tam bad ba ngin bud ïa ki dienjat jong u.”
U Bah Adelbert la pynkynmaw ruh ïa ki kam kiba u Dr Ricky u la trei ha kine ki ar snem duna naduh ba u la jop ha ka ilekshon MP, u la trei shibun ki kam la ka dei hapoh ïingdorbar thawaiñ ne shabar ha ki mat bapher-bapher.
“U Dr. Ricky um shym la ïehnoh ïa ki paidbah ka Jylla ban shu lap miet ban shong Delhi, ngi ïohi ba u la kren bad leh ïa ki kam ba bun, lada dei ba u Blei un buh ïa Dr. Ricky ha kane ka pyrthei ha ki San snem katno ka Jylla kan ïohi ïa ki jingkylla bad ki kam kiba un kynjoh,” u la ong.
U Bah Adelbert Nongrum u la ong ba da ka mynsiem ba sngewkhia ha ryngkat bad ki paidbah ka North Shillong Constituency u phah ka jingsngewlem sha ka ïing jong u Dr. Ricky ba u Blei un phah ïa ka mynsiem ban pyntngen ïa ki.
