Imphal, Rymphang:
U Myntri Rangbah ka jylla Manipur, u Yumnam Khemchand Singh, u la ong ha ka sngi Palei ba ka jingthmu ba kongsan jong ka sorkar jong u ka long ban weng ïa ka jingduna jingshaniah hapdeng ki ar jaitbynriew bad ban ïarap ïa ki briew kiba la shah pynphetwir hapoh ka ri ban leit phai biang sha la ki jong ki ïing ki sem da ka jingsuk bad jingsngewbha.
Ha ka sien kaba nyngkong naduh u bnai Jymmang 2023 haba la shah ktah ha ka jingïakynad hapdeng ki jaitbynriew ha Manipur ka long ba u Myntri Rangbah u la ïakynduhlang bad ki riewphetwir jong ki jaitbynriew Meitei bad Kuki-Zo.
U Khemchand u la ïakren bad ki nongphetwir na Kuki-Zo jong ka Churachandpur bad Kangpokpi lyngba ka jingïakren ha ka durkhih bad ïakynduh ïa ki nongphetwir jong ka Meitei ha Imphal. Ka sorkar ka la pyllait T.33 klur sha ki nongphetwir lyngba ka jingai jingmyntoi beit beit. Ha ka jingïakren, ki riewphetwir jong baroh ar tylli ki jaitbynriew ki la ïathuh ïa ka jingeh kaba ki la mad ha kine ki lai snem ba la dep.
Kawei ka samla Kuki na Kangpokpi district ka la ong ïa u Myntri Rangbah ba un kheiñ ïa ka kum ka khun jong u bad ka la ong ba ka ïakynduh jingeh ban bteng ïa ka Post-Graduation jong ka.
Kumjuh ruh kawei ka longkmie Meitei ka la kyrpad ïa u Myntri Rangbah ba un ailad ïa ka ba kan leit phai noh sha la ïing ha ka shnong Moreh kaba don ha khappud ka India bad ka Myanmar. “Ngan ym shah ba ki ummat jong phi kin long lehnohei,” la ong u Khemchand.
