Shillong, Rymphang 20
Ka Meghalaya Cricket Association’s Senior Women Selection Committee mynta ka sngi ka la ai kyrteng ïa ka kynhun ïalehkai jong ka, kaba don 15 ngut ban ïakhun ha ka U-23 Women’s One Day Trophy 2025-26 plate group jong ka BCCI, ka ban long ha u bnai ban wan.
Ïa kane ka kynhun yn pynïaid da ka jingïalam ka Monica L Phawa kum ka ‘captain’ bad ka Suriti Kumari Ray kum ka ‘vice captain’. Baroh arngut ki dei ki nonglehkai ba la tbit bha bad ki la dep ban mihkhmat ïa ka kynhun ba la kham rangbah jong ka Meghalaya ruh kumjuh.
Baroh ki jingïakhun jong ka Meghalaya kin long ha Chandigarh. Ka Meghalaya kan ïakhun nyngkong eh bad ka Sikkim ha ka 3 tarik u Lber bad kiwei pat ki jylla kiba don lang ha ka plate group ki long ka Mizoram, Nagaland, Arunachal Pradesh bad Manipur.
Ka jingpynkhreh ïa kane ka lympung ïalehkai kan long naduh ka 23 haduh ka 27 tarik u Rymphang ha madan MCA ha Polo, Shillong. Ki nongïalehkai bad ki ‘support staff’ na shabar jong ka nongbah Shillong (kynthup ïa ki ‘standby’) ki dei ban wan report sha nongbah Shillong ha ka janmiet jong ka 22 tarik u Rymphang. Kane ka kynhun kan hiar beit sha Chandigarh na Shillong ha ka 28 tarik u Rymphang.
Ka kynhun ka Meghalaya: Monica L Phawa (C), Suriti Kumari Ray (VC), Ankita Sharma, Indariakor Kharwanniang, Mansi Anand, Monica Singh, Saradafica Kharbani, Fennysha Nongrum, Ritreki Pohshna, Cheanchi K Sangma, Janika Marak, Abiezer K Syiem, Chandni K Sahani, Blaridahun Dkhar, Iaphilaribha Diengdoh
Ki ‘Standbys’: Neelam Roy, Yoolang Suting, Fullnessy Mawlong, Rikmanchi M Sangma, Ronjoli Basumatary
Ki ‘Support staff’: Hemant Roy (head coach), Ashish Dasgupta (assistant coach), Sushma Thapa (physio), Apurva D Nandkarni (trainer), Baiahunlang Mylliemngap (manager).
