Imphal, Rymphang:
Ki pulit jong ka Manipur ryngkat bad ki bor pahara ki la kem ïa lai ngut ki lehnoh kiba don jingïadei bad ki kynhun ba la shah ñiew beaiñ ha ki jingïatreilang ha kylleng ki distrik jong ka Imphal West, Imphal East bad Bishnupur, katba ka jingwad kyrpang ha ka distrik Kakching ka la pynlong ban lap ïa ki tiar siat, ki kuli bad ki tiar pynbthei kiba la buh kyrpang.
Ki arngut ki lehnoh kiba la ithuh kum ki lehnoh ba trei borbar jong ka kynhun RPF/PLA ki la shah kem na ki jaka bapher bapher ha ka 19 tarik u Rymphang bad la kem ïa u Thounaojam Prempatra Singh ba la tip ruh da ka kyrteng kum u Luwang bad kum u Prem (31) uba shong ba sah ha Khurai Thangjam Leikai na Singjamei Chinga Makha kaba don hapoh thanad jong ki pulit jong ka Singjamei West West. U Tharoijam u Tony Singh (32) uba na Khurai Thoudam Leikai u la shah kem na ki thaiñ Porompat kaba hap ha Imphal East district.
Ki heh pulit ki la ong ba kane ka jingleh ka long ban pynthut ïa ki lad dawa pisa bad ban khanglad ïa ka jingleit jingwan jong ki tiar beaiñ.
Na ka liang jong ki pulit ki la ïathuh ba ki tiar ba la ïoh ban kurup ki kynthup ïa kawei ka 9 mm pistol ryngkat ki kuli, 4 song ki kuli 9 mm, kawei ka Honda Activa scooter, 2 tylli ki Mobile Phone, kawei ka Sling Bag bad ar tylli ki bek pisa.
Ha kawei pat ka jingkhynra kaba la pynlong ha kajuh ka sngi, ki bor pahara ki la kem ïa uwei u lehnoh uba la batai kum u nongtrei ba trei shitom jong ka kynhun PREPAK (Pro).
U Ningthoujam Kennedy (41 snem) uba la tip kum u Guli uba la tip kum u Angousana uba shong ba sah ha Moirangkampu Mayai Leikai u la shah kem na Khewa Bazar kaba hap hapoh jong ka Porompat police station ha Imphal East district. La ïoh ban kurup ïa kawei ka Mobile Phone bad kawei ka Aadhaar Card.
Kyrpang, uwei u dkhot jong ka UPPK, u Khoisnam Morendrajit Singh ba la tip ruh da ka kyrteng kum u Kumar (42) uba shong ba sah ha Langjing Achouba Mamang Leikai ha Imphal West district, u la shah kem na Malom Tulihal Makha Leikai kaba don hapoh thanat pulit jong ka Nambol ha Bishnupur distrik. La ïoh kurup ïa kawei ka Mobile phone bad kawei ka Aadhaar Card.
