Shillong, Rymphang 20
Ka jingbym biang bad jot rathai ka surok ban leit sha ka Dewlynnong Nongkhnum, kaba la tip ruh kum kawei na ki Dewlyngnong ba itynnad bad kaba wan ba ar ha ka jingheh hapoh dewbah Asia, ka la pynsniew dur bad pynhiar dor ïa ka jingitynnad jong katei ka Dewlynnong bad kane ka la pynhiar ruh ïa ka jingdon ki nongwan jngohkai pyrthei na kylleng ki jaka.
La sakhi ruh ba ka surok ban leit sha katei ka jaka, ka la jot rathai naduh ka shnong Lawse, Sohparu, ter-ter shaduh ban da poi ha katei ka jaka.
Haba ïaid lyngba katei ka surok la ïohi ba jan baroh shi lynter katei ka surok ka la long kaba la jot lut bad ka la pynshitom shibun ïa ki paidbah ba kin ïaid khamtam eh ïa ki kali rit.
Ym tang katta hynrei la ïohi ruh ba wat ka surok kaba dang shu dep shna dang shen kaba dei ka surok kaba pynïasoh na parking rim shaduh sha rud um ruh mynta ka lah da jot khlem pat dap wat tang shi snem ruh.
Ha ka jingïakren bad u Bah Eknesius Ïawlar bad u Bah Banteiborlang Marweiñ ki nongpyniaid ka Hala Tynrai Eco Tourism Co-operative Society Ltd Nongstoiñ ki la pynpaw ïa ka jingbynñiaw namar ka kam jngohkai ka hiar tang na ka daw katei ka surok.
