New Delhi, Rymphang:
Ka seng Congress ha ka sngi Palei ka la kam ba khyndai tylli ki durkhih jong ka kiba la shna da kaba pyndonkam da ka Artificial Intelligence (AI) la “pyndam jubor” da ki sorkar BJP ha ka sorkar jylla bad ha ki katto katne ki sorkar jylla. Ka seng ka la ong ba katei ka jingleh ka dei ka “jingpyndonkam bakla kaba paw” ïa ki kyndon khanglad bad ka la kwah ïa ka jingpynshai na ka sorkar.
Ha ka jingïalang bad ki nongthoh khubor, ka Supriya Shrinate, ka heh jong ka tnad Social Media jong ka seng Congress, ka la kynthoh ïa u Myntri Rangbahduh ka ri, u Narendra Modi bad ki sorkar jylla ba la synshar da ka BJP, ba ki la teh lakam ïa ka jingïapher jingmut.
Ka la kam ba ki durkhih AI ba la pyndam baroh ki don ki jingpynpaw ba biang kiba pyni ba ki dei kiba la pynmih da ka AI bad kim shym la thmu ban ïalam bakla ïano ïano ruh.
Ka Shrinate ka la ong, “Ha baroh kawei ka jingjrong por jong ki durkhih, ka ‘AI-Generated Video’ ka paw ba la pyni hakhlieh duh, ha kaba ka la paw shai ba kam shym don kano kano ka jingpyrshang ban ïalam bakla ne thok ïano ïano ruh,” ong ka khubor ba la ïohlum.
Katkum ka jingong jong ka, ki hukum ban pyndam ki la wan na baroh ar tylli ki bor synshar jylla ha Bihar, Rajasthan, Madhya Pradesh, bad Maharashtra, bad kumjuh ruh na ka tnad Electronics and Information Technology hapoh ka jingkhmih jong u Myntri ka sorkar pdeng u Ashwini Vaishnaw.
Ka Shrinate ka la kynthah ïa ka rukom pynïaid jong ka sorkar Modi ïa ki jingthmu jong ka AI, da kaba kdew ïa ka jingïakynad halor ka Galgotias University kaba la pyni ïa u ksew robot ba la shna da ka China ha ka India AI Impact Summit kum ka jingpynwandur thymmai jong ka hi. Ka la kynthoh ba kane ka pynpaw ïa ki mat kiba kham jylliew jong ka jinglehkai ban ïa ka jingpynwandur thymmai. “Ka jingleh pyrthuhbud kam dei ka jingpynthymmai, hynrei hato ka sorkar ka sngewkhia mo? Modi, wat la phi ong kumno kumno ruh, ka pateng jong phi ka dei kata ka skulbah shimet kaba la wanrah ïa ngi ka jingjah burom ha ka pyrthei baroh kawei”, ka la ong.
Ka la kynnoh ruh ba ha ka jaka ban pyndam ïa ki durkhih AI bad ban tehlakam ïa ka jingïapher jingmut, u Myntri Rangbahduh u dei ban pynleit jingmut ha ki jingmyntoi jong ka ri, ka hok jong ki nongrep, bad ki mat synshar.
Ka seng ka la buh jingkylli ruh lada ïa ki jingkren beiñ bad jingkynthoh saiñ hima sima da kaba pyndonkam ïa ka AI yn leh kumjuh, da kaba maham ba kum kane ka jingpynbeit pud ka pynduhjait ïa ki jinglaitluid jong ka synshar paidbah.
