Agartala, Rymphang:
U Sudhangshu Das, uba long u Myntri ka tnad SC Welfare ha Tripura, ha ka 18 tarik Rymphang, u la pynpaw ïa ka jingkyrmen ba ka hok kan synshar ha Bangladesh hapoh ka sorkar thymmai jong ka bad ba ka jingshah lehbeiñ jong ki Hindu ha ka ri ba marjan kan kut noh.
Kane ka jingkren jong u ka long hadien ba u Tarique Rahman u la bam smai kum u Myntri Rangbahduh ka Bangladesh.
Haba ai khublei ïa u Rahman uba la shimti ïa ka shuki, u Das u la ong ba u don ka jingkyrmen ba ka sorkar synshar paidbah kan nang khlaiñ hapoh ka jingïalam jong u.
“Nga ai khublei ïa u Tarique Rahman, u khlieh ba thymmai jong ka seng saiñpyrthei BNP jong ka ri Bangladesh, ha kaba u la bam smai kum u Myntri Rangbahduh ka Ri. Nga don ka jingkyrmen ba hapoh ka jingïalam jong u, yn sa thaw ïa ka sorkar synshar paidbah ha Bangladesh, bad baroh ki briew kin ïoh ïa ka hok.
U Das u la kyntu shuh shuh ïa u Myntri Rangbah ba thymmai ban pynthikna ban pyllait noh mardor ïa u Chinmaykrishna Das Prabhu, uba u la kam ba u la shah set phatok halor ka mukotduma kaba shu kynnoh bymhok.
Ka jingkren jong u Myntri ka Tripura ka pyni ïa ka jingsngewkhia kaba nang jur ha kane ka thaiñ Shatei-lam-Mihngi halor ki khubor ba la kynnoh ba la don ka jingshah thombor pyrshah ïa ki jaidbynriew rit paid ha Bangladesh.
