Shillong, Rymphang 20
Ki Ophisar ka Commissionerate of Food Safety ki la pynlong ïa ka jingleit ban peit bniah ïa ki dukan die sha, die jingbam ha ki thaiñ Polo ban shim nongmuna ïa ki jingbam bad ban pynlong ïa ka jingpeit bniah la ki long kiba bit ne em ban bam.
Ha kane ka jingleit ban shim nongmuna na ki katto katne ki dukan ki ophisar ka tnad ki la lap ruh ba ki don ki dukan shet jingbam kiba lehsih bad ïaidlait ïa ki kyndon ba la bthah da ka Commission kaba la pynlong ka jingbuh jingma ïa ki paidbah.
Kane ka jinghiar ki Ophisar ban shim nongmuna ïa ki jingbam ka long hadien ba ka Commission ka la ïoh jingmudui na ki paidbah. Ïa kiba la shim nongmuna ka tnad kan sa aiti sha ka Municipal ban peit ban khmih bad ban leh ïa kaba donkam.
Haba kren sha ki nongthoh khubor U Bah M Diengdoh, Ophisar jong ka Food Safety u la ïathuh ba ha kane ka jingleit ban peit bniah ïa ki jingbam la lap ïa ki saw tylli ki dukan kiba la ïaid lait na ki kyndon jong ka Commission ha kaba ki Ophisar ki la shim noh bad bthah ba kim dei shuh ban die ïa kine ki jingbam ba la sniew.
Haba bynrap u la ong ba ka umphniang ban shet jingbam ym dei ban shet biang palat ïa ka lai sien, namar palat ïa ka lai sien ka umphniang ka la sniew bad ka lah ban thaw kino-kino ki jingsniew ha ka met ki nongbam.
