Ranchi, Rymphang:
Ki khubor halor ka jingshah rahbor jong ki khynnah ki la pynmih ïa ka jingtieng jingsyier ha kylleng ka jylla Jharkhand, kane ka la wanrah ïa kiba bun ki jingjia thombor jong ki paidbah kiba la jia ha kine ki san sngi ba la leit. Ym duna ïa ka 12 tylli ki jingjia shah thombor ha ki paidbah kiba la pynshong nongrim ha ka jingsuba la ïathuh na ki bynta bapher bapher jong ka jylla, kaba la pynlong ïa ki pulit ban pynmih ïa ka jingkyrpad kaba kyrkieh ban tehlakam halor kine ki jingjia.
Ha ka step jong ka sngi Palei, ki la don lai ngut ki briew kiba lui-lui, ha kaba arngut ki dei ki kynthei bad uwei u shynrang ki la shah ker tawiar ha ka kynhun u paid bhur ha ka thaiñ Edalhatu ha Ranchi halor ka jingsuba ba ki donkti ban tuh ïa ki khynnah. Kine ki la shong ha ka Auto-rickshaw ban leit jingleit ha ryngkat i khun jong ki ha ka por ba jia ka jingjia.
Katkum ka jingïathuh jong ki nongsakhi halor ka jingjia, ine i khyllung kiba ki ïalam i la ïam, ha kaba la don kiba ïohsngew ïa kane bad ki la leit pynbna khubor ba la don ki briew kiba pyrshang ban rahbor. Haba kane ka khubor hamsaïa ka la pur kylleng, ki nongshong shnong ki la ker tawiar bad ki la pynsangeh ïa ka Auto-Rickshaw bad tan ïa kine ki lai ngut shabar ka kali. Kine kiei kiei baroh ki la wanrah ïa ka jingshah thombor kaba ishyrkhei, naba ki nongshong shnong ki la thombor pyrshah ïa ki khlem da kylli ne tohkit tikna ban lap ïa ki jingshisha.
Ki pulit na thanat Bariatu, hapoh ka jingïalam jong u ophisar ba dei peit u Manoj Kumar, ki la poi mardor sha katei ka jaka bad ki la pyllait im ïa kitei ki briew, kaba la lah ban khanglad ïa ka jingjia kaba lah ban wanrah ïa ka kam pynïap briew. Kine ki briew ki la shah ïalam sha ka jaka treikam jong ki pulit na ka bynta ban shah kylli jingkylli.
Ki jingtohkit ba hashwa kim shym la pynthikna ïa ka jingdon jong kano kano ka kynhun runar kaba la donkti ban rahbor ïa ki khynnah. Ki heh pulit ki la ïathuh ba ym pat lah ban tip la ka don ne em ka jingpyrshang ba shisha ban rahbor ïa utei u khyllung, bad ka jingtohkit halor kane ka dang ïai bteng.
Ka jingjia ha Ranchi ka dei ka bynta jong ka rukom kaba wanrah ïa ka jingsngewkhia. Ha kine ki san sngi ba la dep, kum kine ki kam thombor jong ki paidbhur kiba pynshong nongrim ha ki khubor hamsaïa ba ki khynnah ki shah rahbor, ki la mih na Dhanbad, Chatra, Jamshedpur, Jamtara, Giridih, Ramgarh, Latehar bad Bokaro.
Lai sngi shwa kane ka jingjia, uwei u briew, u la shah shoh haduh ban da ïap ha ki thaiñ Piparwar jong ka Chatra distrik hadien ba la suba ba u donkti ban rahtuh ïa ki khynnah. Ki jingtohkit hadien ki la pynpaw ba utei u briew uba la khlad noh u dei uba don ka jingshah ktah ha ki bor jingmut jingpyrkhat bad um don jingïadei bad kano kano ka jingpyrshang ban rahbor.
Ha ka sngi Balang, arngut ki kynthei ki la shah thombor ha ki kynhun ki riewpaidbah ha ka thaiñ Baghmara jong ka Dhanbad hadien ba la mih kum kine ki khubor. Ki pulit ki la shim ïa ka jingtuklar ha ka por kaba biang bad ki la lah ban pyllait im ïa ki. Shwa ïa kane, ha ka 16 tarik u Rymphang, 6 ngut ki kynthei ki la shah thombor ha Bokaro halor ka jingsuba ba ki dei ki dkhot jong ka kynhun runar kaba rahbor ïa ki khynnah shwa ba ki pulit kin tuklar bad pynthikna ïa ka jingshngaiñ jong ki.
Ki pulit ka Jharkhand ki la kyntu ïa ki nongshong shnong ba kim dei ban shim ïa ka aiñ ha la ki jong ki kti bad ban kiar na kaba leh eiei halor ki jingtip bym lah ban pynshisha kiba la saphriang ha ki Social Media, khamtam ha ka WhatsApp.
Ki bor pynïaid ki la kyrpad ïa ki paidbah ba lada don kano kano ka kam kaba suba ba ki dei ban ujor sha thanat ba jan tam ha ka jaka ban pyndonkam da ki kam thombor.
