Shillong, Rymphang 20
Ka Ïingdorbar jong ka Khasi Hills Autonomous District Council (KHADC) ka la weng noh ïa baroh ki mat jingïatai (Business) kiba la pynbeit ban ïatai ha ka sngi ba lai ka jinglong Dorbar namar ka jingkhlad ba kyndit noh u MP ka Shillong Parliamentary Constituency u Dr. Ricky A. J. Syngkon.
Ha kane ka sngi, ka Ïingdorbar ka la shim jingmynjur tang ïa ka ‘Vote on Account’ jong ka mang tyngka ba la wanrah da u Executive Member ba khmih ïa ka tnat pla tyngka ha ka 18 tarik Rymphang.
Ha shuwa ban ïoh ka jingmynjur ïa ka mang tyngka, u nongïalam ka Liang Pyrshah u Bah Titosstarwell Chyne u la ïeng ban kyntu ïa u Symbud Shongknor ban pynduh noh ïa ki prokram baroh kiba la pynbeit ban don ha kane ka sngi.
“Kum shi bynta ban burom ïa ka jingkhlad kyndit u MP ka Shillong Parliamentary Seat u Dr. Ricky A. J. Syngkon nga sngewdei ban ai jingmut ïa ka ïing ban pynduh noh ïa baroh ki prokram jingïatai (Business) ba la pynbeit ban don mynta ka sngi” la ong u Bah Titos.
Ha shuwa ban pynwai Dorbar u Symbud Shongknor u la khot lang ïa ka ïing ban ïeng lang baroh ban pynlong ïa ka jingsngap jar ba shi minit kum ka dak ka jingburom ïa u MP ka Shillong Parliamentary Seat u Dr. Ricky A. J. Syngkon uba la khad kynsan ha ka janmiet jong ka 19 tarik u Rymphang 2026.
Kum ban shu kdew ïa kane ka mang tyngka kaba T. 36,99,83,830 ka long na bynta lai bnai lane ka ‘Vote on Account’ jong u snem 2026-2027 ka ban treikam naduh ka 1 tarik u Ïaïong 2026 haduh ka 30 u Jylliew 2026.
Kane ka jingmang pisa ban pynlut hapoh kine ki lai bnai ka long ha kaba siew tulop ïa ki dkhot jong ka Council, ki Ophisar, ki Nongbishar, ki nongtrei ha ki tnad treikam bapher-bapher kynthup ruh ïa ki nongtrei kiba la shongthait jong ka Council kumjuh na ka bynta ki kam pynroi nalor kiwei-kiwei pat ki jingdonkam kiba ka Council ka dei ban pynlut.
