Shillong, Rymphang 20
U Manoj Sarkar uba la ïoh ïa ka khusnam Arjuna u la mynsaw jur ha ka jingjia ïatyngkhuh kali katba u dang wan phai na Lucknow sha Rudrapur. Ka kali jong u ka la duh ïa ka bor ban tehlakam bad ka la tynrah ïa kawei ka kali Nilgai hajan ka shnong Sandila.
U Manoj Sarkar, uba la ïoh ïa ka khusnam Arjuna, u la mynsaw jur na ka jingjia tyngkhuh kali. Utei u rangïalehkai, uba dang wanphai na Lucknow sha Rudrapur, ha kaba ka kali kaba u shong, ka la duh ïa ka bor ban tehlakam ka la kum leit tynrah ïa kawei ka masi hajan ka shnong Sandila ha Uttar Pradesh. Une u rangïalehkai u la mynsaw jur bad la pynthiah ïa u ha ICU jong kawei ka ‘private hospital’ kaba don hajan katei ka shnong. U Manoj Sarkar u dei u nongïalehkai ‘para-badminton’ ba pawnam jong ka Ri India uba la shah pynkup burom da ka khusnam ‘Arjuna Award’ ha u snem 2018. U dei uba wan na Rudrapur, Uttarakhand, bad u la long ruh u nongïalehkai ‘shutler’ ba nyngkong ha ka pyrthei ha ka para-badminton.
U Manoj Sarkar, u la ïoh bun tylli ki takma ha ka jingïalehkai jong u ha ka pyrthei, kynthup ïa 18 tylli ki takma ksiar. U la ïoh ruh ban khur ïa ka takma rnong ha ka Tokyo Paralympics ha u snem 2020.
Ka khana jingim jong u Manoj Sarkar ka long kaba ai mynsiem shibun. U la pynlut ïa ka jinglong khynnah jong u ha ka jingduk bad um don pisa wat tang ban thied ka ‘badminton’. Ka kmie jong u ka trei tang kum ka nongbylla hynrei ka la lah ban pynthied ïa ka ‘badminton’ na ka bynta jong u.
