Shillong, Rymphang 20
U Myntri Rangbahduh ka Ri India u Narendra Modi bad u Nongïalam ka Liang Pyrshah ha Lok Sabha u Rahul Gandhi ki la phah ka khubor sngewlem halor ka jingkhlad kyndit u MP ka Lok Sabha na Shillong Parliamentary Constituency u Dr. Ricky A. J. Syngkon hynnin ka miet sngi Palei.
Ha ka rynsan X u Modi bad u Rahul ki la pynpaw ka jingsngewsih halor ka jingkhlad noh u Dr. Ricky bad pynpaw ruh ba ka jingshakri jong u Dr. Ricky ïa ki paidbah ka Jylla Meghalaya kan ïaisah jingkynmaw.
Ki la phah ruh ka khubor sngewlem na ka bynta ki bahaïing hasem, ki paralok parajor bad ki nongkyrshan jong u baroh ha kane ka por ba sngewsih.
Kum ban shu kdew hangne u Dr. Ricky u la khlad noh ha ka miet 19 tarik u Rymphang ha ka por kumba 8.30 eiei hadien ba u la kyllon katba u dang ïalehkai phutbol bad ki paralok ha Madan Futsal kaba ha Mawïong bad la pynkit ïa u sha Dr. H. Gordon Roberts Hospital bad ki bor pynïaid hospital ki la pynbna ba u la khlad noh.
Ka jingleh burom khatduh ïa u Dr. Ricky kan long ha ka 21 Rymphang 2026 kata ka sngi Saitjaiñ hashwa ban leit ontep ïa u ha u Lum jingtep ka Balang Presbyterian Sumer ha Ri Bhoi District.
