Shillong, Rymphang 20
Ka Ïingdorbar Thawaiñ ha ka sngi Thohdieng jong ka taïew ka la pynsangeh noh shuwa ïa ka Dorbar Mang Tyngka kum ka dak ka jingsngewlem halor ka jingkhlad noh u MP u Dr. Ricky A. J. Syngkon.
U Lamphang ka Ïingdorbar Thawaiñ ka Jylla u Thomas Sangma u la pynbna hapoh Ïingdorbar ba yn pynsangeh noh shuwa shipor ïa ka Dorbar kum ka dak jong ka jingsngewlem ïa ka jingduhnoh ïa u MP ka Lok Sabha na Shillong.
Ka Sorkar ka la pynbna ruh ba lashai ka sngi Saitjaiñ ka leit ontep ïa u Dr. Ricky A. J. Syngkon kan dei beit ka sngi shuti ba baroh ki ophis treikam kiba hap hapoh ka Shillong Parliamentary Constituency kin nym long trei.
Ïa ka Dorbar Mang Tyngka, lah ban pynlong biang ha ka sngi Nyngkong kum ka dak ka jingburom halor ka jingkhlad noh jong u MP.
Ha kane ka sngi ka Ïingdorbar ka pynlong tang ka jingkren halor ka jingduhnoh ïa u MP ka Jylla ha kaba la sdang ïa ka da u Myntri Rangbah ka Jylla u Conrad K Sangma uba la pynpaw ïa ka jingïakynduh ïa u Dr. Ricky Syngkon bad ki kam kiba ki la ïakren ban pynïaid sha khmat kiba ïadei bad ka Jylla.
La ïashim bynta ruh da u nongïalam ka Liang Pyrshah u Dr. Mukul Sangma, uba la pynpaw “Ngim don kyntien ban kren hynrei u Blei u tip kham bha haba ïadei bad kane, ai ba ka mynsiem jong une u nongïalam kan ïoh ïa ka jingjahthait bymjukut”.
La ïashim bynta ruh da u Bah Charles Pyngrope, Bah Mayralborn Syiem, Bah Renik L Tongkhar, Kong Ampareen Lyngdoh bad kiwei kiwei de ki MLA.
