Shillong, Rymphang 20:
Ki bahaïing hasem ryngkat ki nongïalam ka seng Voice of the People Party (VPP) ki la ïoh ban rah noh ïa ka met jong u Dr. Ricky A. J. Syngkon na ïingsah kaba don ha Pohkseh Shillong ha ka por 1:00 baje nohphai sngi ban leit buh sha jaka ba u shong u sah ha Nongsder, Ri Bhoi District.
Kumban shu pynkynmaw ïa u Dr. Ricky la rah na Robert Hospital Shillong sha Pohkseh hadien ba la pyntip ba u la khlad noh na kane ka sla pyrthei hadien ka jingshitom ba u kyllon ha madan futsal kaba u ju ïalehkai ha ka janmiet jong ka 19 tarik mynta u bnai Rymphang.
Hashwa ban rah sha Nongsder la ïohi ba ki paidbah ki la wan ïenglaiñ naduh dangstep ban leit ai khublei khatduh ïa ka met kaba dangsah kaba ki la pynthiah ha Pohkseh kaba u ju shong u sah barabor.
Nangta la ïohi ba ki nongïalam jong ka Jylla naduh u Conrad K Sangma Myntri Rangbah ka Jylla, u Dr. Mukul Sangma uba dei u nongïalam ka Liang Pyrshah ki la wan poi ha Pohkseh ban wan sngewlem ïa ki bahaïing hasem.
Haba la rah na ïingsah ha Pohkseh la ïalam da ka kali pulit shaduh Nongsder ha ka jingsynranlang ki nongkitkam ka VPP bad ki paidbah.
Kumjuh ruh ki paidbah kiba la ap lypa sha Nongsder ki la bun kiba la ïam namar ka jingkhlad ba kyndit une u nongïalam jong ka Jylla.
Ïa u Dr. Ricky Syngkon yn sa pyndep noh lashai ka sngi ha Nongsder, ban leh burom khatduh da ka Balang Presbyterian Sumer, Ri Bhoi District.
