Shillong, Rymphang 20
U Lamphang ka Ïingdorbar Thawaiñ, u Thomas A. Sangma u la pynpaw ïa ka jingai burom ïa u MP ka Shillong ba la khlad noh, u Dr. Ricky A. J. Syngkon, da kaba pule ïa ka jingthoh halor ka jingim jong u ha ka por ba ïaid ka bynta jong ka ‘Obituary Reference’ hapoh Ïingdorbar ha ka Sngi Thohdieng.
Ha kajuh ka por, la pynsangeh noh ïa baroh ki kam ba la buh por na ka bynta kane ka sngi.
U Dr. Syngkon, 54 snem ka rta, u la khlad noh ha ka 19 tarik Rymphang bad la kha ïa u ha ka 6 tarik u Kylla-lyngkot, 1972, ha Laitum-khrah, Shillong bad u dei u ‘riewshemphang bad ‘riewsaiñ pyrthei uba aiti lut sha ka kam.
Ka jingpule ba sdang jong u ka la long ha ka skul St. Edmund’s bad nangta u la pyndep pat ïa ka jingpule skul jong u na ka skul Laitumkhrah Presbyterian. U la bteng ïa ka jingpule jong u ha Shillong Commerce College.
Ha kajuh ka por, u la pyndep ïa ka ‘Master’s Degree’ ha ka sobjek Economics bad ka ‘Doctorate’ ha ka Economics na North Eastern Hill University.
U Dr. Syngkon u la rung sha ki kam paidbah ha u snem 2023 hadien ba u la ïakhun ïa ka ilekshon sha ka Ïingdorbar Thawaiñ ka Jylla na Umsning konstitwensi kum u kyrtong ka Voice of the People Party (VPP). Nangta u la ïakhun ïa ka ilekshon bah jong u snem 2024 na Shillong Parliamentary konstitwensi na ka VPP ha kaba u la ïoh ïa ka jingjop don burom, kaba la pynlong pat ïa u kum u dkhot jong ka Lok Sabha kaba 18.
“U dei u dkhot nongseng jong ka VPP bad u la shakri kum u General Secretary jong ka seng,” la ong u Lamphang.
“Kum u nongmihkhmat, la tip ïa u Dr. Syngkon na ka bynta ka jinglong ba shida jong u, ka jingngam jingjylliew ha ka jingshemphang, bad uba ïeng halor ka hok bad ka roi ka par jong ka Thaiñ Shatei Lam Mihngi,” u la ong.
“Ha ryngkat ka jingpynshong nongrim ha ka jingngeit jong u, u la pyni ïa ka jingsngew rit, jingisynei bad ka jingshakri ha ka jingim paidbah bad jingim ba shimet jong u,” ong u Lamphang da kaba bynrap “Watla ngam shym la ïoh lad ban ithuh bha ïa u, nga la ïoh jingtip ba nalor ba u long u ‘riewshemphang uba tbit, u nonghikai bad u ‘riew saiñ pyrthei, u dei ruh u briew uba sheptieng ïa u Blei, u briew uba khlaiñ ka jingngeit. Ha u Nohprah jong u snem ba la dep, u la pynpoi ïa ka khubor jong U Blei sha ki hymmen ki para Garo jong ngi ha Delhi ha ka por jong ka prokram ‘Advance Christmas’ jong ka Delhi Achik Christians Fellowship.”
Shuh shuh u Sangma haba pynpaw ïa ka jingsngewlem, u la ong, “Nga ïasnohktilang bad ka Ïingdorbar ban ai burom ha ryngkat ki jingduwai ha U Blei jong ngi…un ai bor ïa ki bahaïing ha sem, kiba ieid ba thoiñ bad ïa baroh ki nongkyrshan halor kane ka jingduh kaba khraw.”
