Shillong, Rymphang 20
U Myntri Rangbah ka Jylla u Conrad Sangma, u Dr. Mukul Sangma, u Bah Prestone Tynsong bad kiwei pat ki nongïalam ka Jylla ha ka sngi Thohdieng jong ka taïew ki la leit sngewlem sha ka ïingsah u Dr. Ricky A. J. Syngkon kaba don ha Pohkseh.
Haba kren sha ki lad pathai khubor u Conrad Sangma u la ong ba u Dr. Ricky u dei u briew uba bha bad u don ïa ka mynsiem ban ïatreilang, u dei u briew uba kiba bun ki pdiang bad sngewtynnad ïa u.
U la ong ba ka bor ba khraw jong u Dr. Ricky nalor ka kam ba u shakri, ka jingstad bad jinglong ba shisha.. kadei ka jinglong ba shida jong u bad ka jingmut shisha jong u naduh ka mynsiem na ka bynta ka jingbha ki paidbah.
“Man ka por u ju ong ba dei ban ïatreilang bad u ju ong ruh ïa nga ban leit ïakynduh lang ïa ki Myntri ka Sorkar Pdeng ban ïakren ïa ki jingeh ki paidbah ka Jylla. Kumta kane ka jingkren u Dr. Ricky ka pyni ïa ka jinglong ba shisha, ka jingkwah shisha bad ka jingshakri hok jong u ïa ka Jylla bad ki paidbah,” ong u Conrad.
U la pynpaw ruh ba un buh jingduwai na ka bynta ki bahaïing hasem ba u Blei un ai ka bor ïa ki bad ba ka mynsiem jong u kan shong jahthait junom.
Na ka liang u Dr. Mukul pat haba kren sha ki lad pathai khubor u la pynpaw ba ka jingkhlad noh jong u Dr. Ricky ka long ka jingduh kaba khraw ïa ka Jylla, kumjuh ruh ïa ka thaiñ Shatei Lam Mihngi bad ïa ka ri India hi baroh kawei.
U la pynpaw ruh ba u dei uwei na ki nongïalam uba baroh ki ieid bad ka jingshakri jong u kan ïai sah jingkynmaw ha ki paidbah ka Jylla baroh kawei.
