Shillong, Rymphang 20
U President ka seng Voice of the People Party u Bah Ardent Basaiawmoit uba dei u MLA ka Nongkrem Constituency u la ong ba u Dr. Ricky A. J. Syngkon u dei u briew uba sngewrit uba lah ban shaniah.
U la ong ba u Dr. Ricky u wan sha ka lympung saiñpyrthei tang khyndiat por hynrei u ïoh pat ïa ka jingieid bad jingshaniah na ki paidbah.
Haba ïakren bad ki nongthoh khubor hashwa ban leit synran ïa ka met u Dr. Ricky Syngkon sha Nongsder u Bah Ardent u la ong ka jingkhlad u Dr. Ricky ka dei ka jingduhnong kaba khraw ïa ka seng namar u long u nongïalam uba kitkhia.
U la pynpaw ba u Blei un nym iehnoh ïa ka seng, ïa ka jaidbynriew namar ki donkam ïa ki briew kiba shisha, kiba sngewrit bad kiba lah ban shaniah.
U Bah Ardent u la ong ba u Dr. Ricky u dei uba la don bynta ban seng ïa ka VP bad uba kitkhia ïa ka kam kaba la bynshet.
