Shillong, Rymphang 20
U President ba shipor jong ka Pakistan Hockey Federation (PHF), u Mohyuddin Ahmad Wani, u la weng noh ïa ka jingpynjari kaba ar snem ïa u kapten ka kynhun ïalehkai ka ri, u Ammad Shakeel Butt. Hapdeng ki jingkynnoh ba don ka jingpynïaid bakla ha ka por ba ka kynhun lehkai ka ri ka ïashim bynta ha ka wat kaba ar jong ka FIH Pro League ha Hobart, Australia, u heh ka PHF uba la mih noh na ka kam, u Tariq Hussain Bugti u la pynjari da ka hukum kaba ar snem ïa u kapten u Ammad Butt shwa ba un hiar shuki na ka kam jong u. Ha ka sngi Palei, U Shehbaz Sharif, Myntri Rangbahduh jong ka Pakistan, ula pdiang ïa ka jingiehnoh kam jong u Bugti bad thung ïa U Mohyuddin Ahmed Wani, Federal Secretary jong ka Ministry of Inter-Provincial Coordination (IPC), kum u ‘Ad-hoc President’ jong ka synjuk.
Kane ka jingjia ka la jia hapdeng ka jingïakynad halor ka jingleit jngoh jong ka kynhun ïalehkai jong ka Pakistan sha Australia, ha kaba ym shym la lah ban pynbiang ïa ki jaka sah ha ka por kaba biang, kaba pynlong ïa ki nongïalehkai ban pynlut bun kynta ha surok.
Hynrei u kapten jong ka Pakistan, u Ammad Butt, ha ka jingkren lyngba ka durkhih, kham mynshwa, u la kyntait ïa ki jingkynnoh ba ka kynhun ka la shah iehnoh khlem kano-kano ka jaka sah ha hotel lane shah pynbor ban mih sha surok. Hynrei ki nongïalehkai ki la pynpaw ïa ka jingsngewsih halor ka jingsiew TA/DA jong ki man ka sngi kaba long USD 40 na ka PSB, kaba duna ïa ka USD 100 kaba la buh ha ki kyndon jong ka PHF.
Ha ka sngi Thohdieng, u President ba shipor jong ka PHF u Wani, u la pynbna ban weng noh ïa ka jingjari ïa u Butt, da kaba ong ba ka jinglong khuid bad ka jinglong hok, kan ïalam ïa baroh ki rai hapoh ka jingpeit jong u, ong ka khubor jong ka Dawn.
Ka Pakistan ka la shah rem lut ha ka FIH Pro League haduh mynta, bad ka jingïalehkai jong ka baroh kawei ruh ka la shah kynthoh. Ka khubor ka la ïathuh shuh-shuh ba hadien ba u Bugti u la iehnoh ïa ka kam, u Chairman ka Pakistan Cricket Board (PCB) u Mohsin Naqvi u la ïakynduh ïa ki nongïalehkai hockey, ba kynthup ïa u Ammad Butt.
Haba kren ha ki lad pathai khubor hadien ba la wai ka jingïakynduh, u Butt u la ong ba u Naqvi u la ong ïa u ba kam don shuh kano-kano ka jingpynjari bad ba kane kajuh ka kynhun kaba la leit jngoh ïa ka Australia kan leit ruh sha Egypt.
