Srinagar, Rymphang:
U Myntri Rangbah ka jylla u Omar Abdullah ha ka sngi Palei u la pynbna ba baroh ki jaka jngohkai pyrthei ha Jammu & Kashmir kiba la khang hadien ka jingthombor jong ki lehnoh ha Pahalgam yn plie biang hapoh u bnai Jymmang, bad khyndai tylli ki jaka jngohkai pyrthei kiba thymmai ruh yn plie ha ka Union Territory.
“Ka kam jngohkai pyrthei ka dei ka bynta bad ka lyngkha kaba kongsan bha na ka bynta ka J&K. Bad kumno ngi la trei ban pynim biang ïa ka kam jngohkai pyrthei ha ka thaiñ hadien ka jingshah thombor ha Pahalgam ha u snem ba la dep tang ma nga uba tip,” ong u Omar haba pynkut ïa ka jingïakren halor ki jingai jingïarap na ka bynta ki tnad kiba hap hapoh ka jingpeit jong u ha ka sngi Palei.
Hadien ka jingshah thombor ha ka 22 tarik, Ïaïong 2025, ha kaba ki lehnoh ki la hiar thma ïa ki nongjngohkai pyrthei ha Baisaran Meadows ha Pahalgam, ha kaba ki la ïap 25 ngut ki nongjngohkai pyrthei bad uwei u nongñiah kulai ka thaiñ, ka kam jngohkai pyrthei ha Jammu & Kashmir ka la mad ïa ka jingduhnong kaba khraw.
Ka jingwan jngohkai pyrthei ha Kashmir ka la hiar na ka 34.98 lak ha u snem 2024 sha ka 11.16 lak, katba ha ka thaiñ Jammu ka la hiar na ka 2.01 klur ha u snem 2024 sha ka 1.62 lak ha u snem 2025.
“Hadien ka jingshah thombor ha Pahalgam, ki nongïashim bynta ha ka kam jngohkai pyrthei ki la sngewtieng ba ha kine ki 2-3 snem ban wan, ym don mano mano ruh ban ïohi sha ka J&K katkum ka kam jngohkai pyrthei,” ong u Omar.
U la ong ba ka sorkar ka la trei shitom bad ka la leit sha ki nongpynïaid ïa ki kam jngohkai pyrthei bad ki nongshim bynta ha ka kam jngohkai pyrthei ha kylleng ka ri.
“Ngi la pynim biang ïa ka kam jngohkai pyrthei wat ha ka por ba ngi hap ban ïathuh ïa ki briew ba phi lah ban wan sha Kashmir hynrei phim lah ban leit sha Doodpathri, Yousmarg, bad kiwei kiwei,” ong u Myntri Rangbah.
“Khie leit sha Sonamarg bad Gulmarg mynta ka sngi, ki Hotel ki la dap lut. Ki hotel ha Srinagar ki don haduh 30-40% ki briew”, u la ong bad bynrap ba ka kam jngohkai pyrthei ka la khie im biang. Ki jaka kiba u la kdew ki kynthup ïa ka Sonamarg, ka Gulmarg, ka Srinagar, ka Doodpathri bad ka Yousmarg.
U Omar u la pynbna ba ka sorkar J&K ka dang ïakren bad ka sorkar pdeng halor ka jingplie biang ïa ki jaka jngohkai pyrthei kiba la khang. “Ka jingïakren jong ngi bad ka sorkar pdeng ka dang ïaid. Ki ruh ki don katto katne ka jingpynbor”.
Ki heh sorkar ki la ong ba ka jingplie biang ïa baroh ki jaka jngohkai kiba la khang kan ïarap ban kyntiew ïa ka jingwan ki nongjngohkai sha ka Union Territory. Hadien katei ka jingshah thombor, palat 60 tylli ki jaka jngohkai pyrthei ha kylleng ka J&K la khang na ka bynta ban peit bniah ïa ka jingpahara.
Dang shen, u Lt Governor u Manoj Sinha u la hukum ban plie biang ïa ki 14 tylli ki jaka jngohkai kiba la khang ha kaba 11 tylli ha Kashmir bad lai tylli ha Jammu.
Kham hashwa, hadien ba ka jinglong jingman ka la kham bha, la plie biang ïa 16 tylli ki jaka jngohkai pyrthei, ba kynthup ïa 8 tylli kawei ha Kashmir bad Jammu, ha u Jylliew jong u snem ba la lah, katba ha u bnai Nailur, la plie biang ïa ki hynñiew tylli ki jaka jngohkai ha Kashmir bad san tylli ha Jammu.
U Myntri Rangbah ka jylla u la pynbna ruh ba yn plie khyndai tylli ki jaka jngohkai thymmai ha Jammu & Kashmir. “Mynta hadien ba la ïakren bad ka GoI bad ka skhim ba la bei tyngka na ka sorkar pdeng, yn plie khyndai tylli ki jaka bathymmai ha J&K. Ka thaiñ Jammu ruh kan ïoh ïa ka bhah kaba dei hok ha kaba plie ïa ki jaka bathymmai”, u la ong.
