Shillong, Rymphang 22
Ka Royal CC ka la khur ïa ka jingjop ha ka Super Division Cricket League 2026 ba la pynïaid da ka Shillong Cricket Association, hadien ba ka la pynliem noh ïa ka Sputnik CC da 6 wiket ha ka sngi U Blei.
Ha kane ka jingïakhun kaba la long ha madan ïalehkai kriket jong ka MCA kaba ha Polo, ka Sputnik kaba la jop ïa ka kynting pisa, ka la shimti ban tied nyngkong ha kaba ka la kamai 209 run bad shah pynkhyllem 8 wiket ha ki 45 over.
Haba wan shimti ïa ka pali kaba ar, ka Royal ka la lah ban kynjoh sha ka thong ha ki 32.5 over ha kaba ka la kamai 210 run bad shah pynhap 4 wiket. U Rajesh Tati u la long u nongtied uba kynsai ha kaba u la ïoh ban khyrwit 69 run na ki 53 bol bad u Raj Biswa u la ïoh 53 run na ki 41 bol. Ïa ka nam Player of the Match la khur da u Swastic Chettri uba la tied 47 run bad khur 1 wiket.
