Shillong, Rymphang 22
U Symbud Myntri Rangbah ba khmih ïa ka tnad Pynroi Sor Bah Sniawbhalang Dhar ha ka sngi Palei jong ka taïew u la pyntip ba ka projek shna madan pynlong tamasa ba bun jait (multi-purpose event ground) ha ka jaka ba 17 akar ha New Shillong ka dang ïaid mynta, ïa kaba la mang pynlut haduh T.101 klur.
“Ka projek kala ïaid shaid shaid katba nga dang kren hangne….ka madan tamasa kan don hapoh ka Knowledge City ha New Shillong, ka ban don marjan ka Stadium, kaba la mang pisa haduh T.101 klur bad kane ka madan kan ngiam haduh 60-70 hajar tam ki briew nalor ka jaka pynïeng kali ha Mawkhanu marjan ka Football Stadium,” ong u Bah Sniawbha haba jubab ïa ka resolution bala wanrah da u MLA ka North Shillong Bah Adelbert Nongrum ha ïingdorbar ha ka sngi Palei jong ka taïew ba la lah.
U la kren halor ka thong jong ka Sorkar ban pynlong ïa ka Shillong kum ka sor ba thaba bad ba don lut kiei kiei baroh, bad ka jaka paidbah ka ban plie ïa baroh.
Ka sienjam kum ka jingpynkylla dur ïa ka Nan Polok, ban pynitynnad biang ïa ki rud Wahumkhrah bad kyntiew kyrdan ïa ka Phan Nonglait Park kila ïaid shakhmat.
U pyntip ba ïa ka jaka ba don harud ka Wah Umkhrah ha Polo, la shna pynitynnad ïa ka kum ka Meghalaya Riverfront Project ba nyngkong eh, kaba la ïaid shaid shaid mynta bad kane kan sa pynthaba ïa ka thaiñ da ki madan jyrngam, ki jaka ïaid kjat, bad ki jaka ïakynduh ba shngaiñ jong ki samla kynthei bad shynrang.
Hapdeng eh jong ka sor, u Bah Sniawbhalang u la ong ba wat ïa ka thaiñ Barik la shna ïa ka kum ka Open Public Plaza bad kane ka projek ka thmu ban pynkylluid ïa ki surok nalor ban ai jaka ïa u paidbah ba un pyndonkam. Kumjuh ruh ïa ka Phan Nonglait Park la kyntiew kyrdan da ki jingshna ba kham bha, ka lynti ïaid ba shngain ïa ki nongleit nongwan bad kiwei kiwei.
