Shillong, Rymphang 22
Ka shi kol ba la thep da u Lalrinzuala Lalbiaknia ka la biang pura ïa ka NorthEast United FC ban khur ïa ka shi point kaba nyngkong eh ha ka Indian Super League, hadien ba ka la lah ban pynïakhaid mar 1-1 kol pyrshah ïa ka Bengaluru FC ha ka sngi U Blei.
Ha kane ka jingïakhun kaba la long ha Kanteerava Indoor Stadium, ka Bengaluru ka la ïakhun tyngeh ha kaba sdang ha kaba ka la ïoh ban pynkhih jar nyngkong ha ka minit kaba 19 lyngba u Brian Sanchez bad ka la tam da 1-0 kol haduh kaba kut jong ka kylla step.
Watla ka NorthEast United kaba la shah rem ha ka jingïalehkai ba nyngkong ha ka East Bengal da 3-0 kol, ka la pyrshang ban ïakhun tyngeh ha ka kylla miet bad tang hadien katto katne por ka la lah ban pynphai kylla ha ka minit kaba 68 lyngba u Lalbiaknia, uba la ïoh ïa ka kabu ksiar lyngba ka jingïarap pynbuh bol da uwei na ki para nongïalehkai. Te kumta une u rangïalehkai ha kaba kut u la khur ïa ka nam Player of the Match.
Haba phai sha kawei pat ka jingïakhun, ka Mumbai City ka la bteng ïa ka jingjop kaba ar da kaba ka la pynliem noh ïa ka Kearal Blasters lyngba ka shi kol ba la thep da u Lallianzuala Chhangte ha ka minit kaba 47.
Lyngba kane ka jingjop, ka Mumbai ka la jam sha ka kyrdan ba-ar bad kamai 6 point, katba ka Kerala ka dangsah ha ka kyrdan ba khatdar bad kam pat shym la lah ban kamai poiñ.
