Shillong, Rymphang 22
Ka National School of Drama (NSD), hapoh ka Tnad Deiriti, ka Sorkar India, dang shen ka la pynlong ïa ka ‘Meghalaya Chapter’ jong ka ‘Bharat Rang Mahotsav’ (BRM) 2026 kaba 25, kaba dei ka tamasa ‘theatre’ kaba heh tam ha ka pyrthei, ha District Library Auditorium, Tura.
Ïa kane ka prokram la plie paidbah da u Bernard N. Marak, Member, District Council, Garo Hills Autonomous District Council, Tura, West Garo Hills, kum u Kongsan, bad Prof. Sujata Gurudev, Pro Vice-Chancellor, North-Eastern Hill University, Tura Campus, kum ka Symbud Kongsan.
Ha ka khubor jong u, na ka bynta ki briew kiba sngewtynnad ïa ka ‘theatre’, u Chittaranjan Tripathy, Director, NSD u la ong, “Ka Jylla Meghalaya kaba itynnad ka la pynmih shibun ki briew kiba don sap ha ka ‘theatre’ bad kane ka dei ka jaka kaba khraw ban kyntiew ïa ka jingsaiñdur bad ka kolshor. Ka phang pdeng jong ka ‘Bharat Rang Mahotsav’ (BRM) 2026 ka long ‘Samvad Sanskritiyon Ka’ kaba dei ka jingkyntiew ïa ki jingïakren hapdeng ki kolshor bapher-bapher.”
U la bynrap shuh shuh, “Ha ka lynti jong ngi ban pynurlong ïa kane, ngi la wanrah bun ki ktien bad ki ktien tynrai ha kane ka kynti bad ngi la pyrshang ban pynlong ïa ka ‘theatre’ kaba kynthup lang katba lah. Ka ‘Tura Edition’ jong ka tamasa ka long ka bynta kaba itynnad jong kata ka jingpyrshang.”
Ha ka ‘Tura Edition’ ka don artylli ki ‘drama’ ha ka 17 tarik Rymphang. Ka bynta ka banyngkong ka long ka ‘KU’BILBAT MUNI’ (Nightmare of Using Mobile Phone of Children), ka ‘drama’ ba la shna ha ka ktien Garo ba la thoh bad direk da u Balsrame A. Sangma, ba la wanrah da ka A-Chik Theatre Tura, Meghalaya.
Ka drama ka kren shaphang ka jingeh jong ka juk mynta na ka jingpyndonkam palat ïa ki ‘mobile phone’ hapdeng ki khynnah lyngba ka jingïathuhkhana kaba sngewtynnad bad kaba ïadei bad ka imlang-sahlang.
Ka bynta kaba ar, ‘THE WISE CREATURE’, ka dei ka ‘drama’ ha ki jait ktien bapher-bapher ba la thoh bad direk da u Jyoti Narayan Nath bad la wanrah da ka Anubhav – ‘The Actors Guild’, Guwahati, Assam.
Ka ‘drama’ ka pyni ïa ka jingshem kaba sngewtynnad ïa ka ‘theatre’, kaba pynïasohlang ïa ki ktien bapher-bapher bad ki jingsngew, bad kaba pyni ïa ka jingriewspah jong ki riti-dustur jong ka thaiñ kaba ïadei bad ka ‘theatre’.
U Jyoti Narayan Nath u la ai ia ka jingkren kaba kongsan na ka bynta ka NSD, bad u Jameswarth Ch. Sangma, President, A-Chik Theatre, Tura, u la ai ïa ki jingkren ai khublei.
Ka ‘Tura Chapter’ ka la kut noh ha ka jingshitrhem, kaba ai ïa ka jingshem ïa ka kolshor kaba ai mynsiem ïa ki briew ha Meghalaya bad kaba la pynïasoh lang ïa ki nongïashim bynta bad ki briew kiba ieid ïa ka ‘theatre’ ha ka jingrakhe kaba iphuh-iphieng jong ka jingïathuhkhana bad ka kam pynbyrngia.
Ïa ka Bharat Rang Mahotsav 2026 kaba 25 la pynlong naduh ka 27 tarik Kyllalyngkot haduh ka 20 tarik Rymphang 2026, kaba la neh 25 sngi bad ka don palat 277 tylli ki bynta ha kylleng ki 228 tylli ki ktien jong ka ri India bad ka pyrthei, kynthup ïa ki katto-katne ki ktien tynrai kiba duna ka jingpaw pyrthei.
Kane ka tamasa ka kynthup ïa ka jingïashim bynta na khyndai tylli ki ri, ha ryngkat ki kynhun ‘theatre’ na man la ki Jylla bad Union Territory jong ka India.
Shuh shuh da kaba rakhe ïa ka jingïar jong ka kam ‘theatre’ jong ka India, ka BRM 2026 ka don ki jingïashim bynta da ki kynhun jong ki khynnah, ki jaidbynriew ‘riewlum, bad ki barikor na ki bynta ba la shah iehbeiñ, kaba pynskhem biang ïa ka jingkut jingmut jong ka NSD ban kynthup lang ïa baroh bad ban pynlong kawei ïa ka kam ‘theatre’.
