Shillong, Rymphang 22
Ka Voice of the People Party (VPP) kan ïai bteng ïa ka thong na ka bynta ka jingkylla ha Meghalaya, wat hapdeng ka jingduh noh ïa u nongïalam jong ka u Dr Ricky AJ Syngkon, la ong u President ka seng u Bah Ardent Basaiawmoit ha ka jingleit ontep ïa u.
“Kum ka seng ngi la don ka jingïalang sngewlem ha kaba kiba bun ki nongïalam bad ki dkhot ki la pynpaw ïa ka jingsngewsih bad kren halor ka jingnoh synñiang jong une u nongïalam ba khraw. Ngi la rai ba ka jingïakhun ban wanrah ïa ka jingkylla ha ka jylla Meghalaya kam pat poi sha kaba kut,” la ong u Bah Ardent.
U la kdew ba ka jingkhlad noh jong u Dr Ricky AJ Syngkon kum “ka jingtynjuh ïa ka jaidbynriew trai ri trai muluk ba ngim dei ban long kiba sngewrit haba U Blei u phah ïa ki briew ban shakri da ka jingkitkhlieh”.
“U mawjam uba khlain u la hap, hynrei kum ka seng, ngi trei da ka jingsngewthuh kaba pura bad ki nongrim kiba shai… “Ngim lah ban ïapynbeit wat la ka long kumno kumno ruh khnang ba ngin lah ban wanrah ïa ka jingsynshar kaba khuid,” u la bynrap.
U Bah Ardent u la pynkynmaw ïa ka jingai jingmut jong u Dr Syngkon ïa u ba um dei ban iehnoh ïa ka kam saiñ pyrthei, da kaba ong “Dei da ka jingieid ba ngi la tei ïa ka seng, ka dei ka ïing ka sem… Ngi hap ban pdiang bad buh ïa ka jingshaniah baroh ha U Blei kum ki briew kiba dang hap ban bteng ïa ka jingïaid lynti.”
U la pynpaw ka jingsngewnguh ïa ka jinglong nongïalam jong u Dr Syngkon da kaba ong, “Kam dei ka spah ne ka ram hynrei ka jingieid kaba une u nongïalam ba khraw u la ïoh na ki briew jong ngi bad kiwei kiwei kiba u la ïakynduh kum u nongïalam.”
Une u nongïalam ka VPP u la ong ba ka jingkiew jong u Dr Syngkon ka dei ka “jingphylla”, bad yn kynmaw ïa ka pateng jong u na ka bynta ka jingieid kaba u la ïoh ha kylleng ki jaidbynriew.
