Shillong, Rymphang 22
Ka National Domestic Worker Movement Meghalaya Region ha ryngkat ki dkhot ka Children Parliament ki la pynpaw ka jingsngewkhia kaba jur halor ka jingjyllei bad ka jingkiew sted kiba kyrni ha u drok ha ka Jylla.
Haba ïakren sha ki nongthoh khubor ha ka sngi Saitjaiñ, ki dkhot ka Children Parliament ki la kyrpad ïa ka Sorkar ba ka dei ban shimkhia ban tehlakam ïa u drok bad ban ym ïeh beiñ ïa ki khynnah kiba la kyrni ha u drok, hynrei ba ka Sorkar kan pyntikna ba ki khynnah kiba la ngat ha u drok ba kin ïoh ïa ki jingai jingsumar ha ki Rehabilitation Centre ha ryngkat ki jingïasyllok, khnang ba kin lah ban wanphai biang sha ka jingim kaba bha bad kaba ïadei bad ka imlang sahlang.
U Emannuel Nongneng Children Par-liament Leader Nongrah, u la pynpaw ïa ka jingsheptieng kaba mih na ka jingkyrni jong u drok ha ka Jylla, “Ngi dei tang ki khynnah hynrei ngi dei ban tip ïa kine ki jingsniew, ngi ïohi ïa ka jingjot jingpra ha ki longïing longsem tang namar ka jingkyrni ha kine ki jingdih pynbuaid.”
U la buh ka jingkyrpad ïa ka Sorkar ba kan thaw ïa ki jaka ai jingsumar (Rehabilitation Centre) ki jaka ban ïoh ka jingsumar ei na ka bynta jong ki khynnah bad buh ki kyndon ba skhem khnang ban lah ban pynduh jait shisyndon ïa ka jingsniew kiba mih na u drok.
“Ka jingkyrni ha ki jingdih pynbuaid kam dei ka kam bymman, hynrei nga pynpaw ïa ka jingdonkam jingïarap na ki bor Sorkar sha kito ki khun samla bad ki khynnah kiba la shah teh mraw ha u drok”
Shuh-shuh ki nongïalam ka Children Parliament ki la pynpaw ba ki khynnah kiba ngop ha ki jingdih pynbuaid kim dei ban ngat ha ki jingshah pynshitom hynrei ki donkam ïa ka jingieit, jingsumar, jingïasyllok kaba biang. Namar kata ki la banjur ïa ka jingdonkam ban don ki jaka ai jingsumar kiba biang ha man la ki District.
“Ka jaka ai jingsumar ïa kiba la ngop ha ki jingdih pynbuaid kumba long mynta, ki long ha ka dor kaba rem bad ki dei ruh tang na ka bynta jong kiba la heh la san, ki khynnah ruh ki donkam ïa ki jaka ai jingsumar kaba kin ïoh ïa ka jingieit bad jingïasyllok ba ki lah ban wanphai pat ha ka jingim kaba biang kum ki khynnah, ki jaka ai jingsumar kim dei ki jaka lehkmen hynrei ki dei ki jaka ban pyllait im ïa kito kiba la don hapdeng ka jingduh jingkyrmen,” la ong ka Jeany Kharkongor.
