Shillong, Rymphang 22
U Myntri Rangbah ka Jylla, u Conrad K. Sangma, u la kynthoh tyngeh halor ka jingïakhih ba dang shen jong ka Congress ha ka ‘AI Summit’, da kaba ong ba ka long ka bym itynnad bad ka rynsan ka bym ïahap satia na ka bynta ka saiñ pyrthei.
“Ka jingleh ‘drama’ ba dang shen jong ka Congress da kaba pynlong ïa ka jingïakhih ba khlem phong sopti ha ka jingïalang ‘AI Summit’ ka long ka bym ïahap. Ha kum kane ka jingïalang, ki nongïalam bad ki seng saiñpyrthei ki dei ban ïeng lang ban kyntiew ïa ka ri. Kam dei ka rynsan ban leh politik… ka dei ka nam ka burom jong ka ri bad kum u nong India, kata ka wan nyngkong eh…,” ong u Sangma ha ka jingthoh ha ka rynsan lad pathai.
Na ka liang u Sangma u la ban jur ïa ka jingdonkam ban don ka jingïatylli hapdeng ki nongïalam bad ki seng ban kyntiew ïa ka nam ka burom jong ka ri, khamtam ha ki jingïalang bah jong ki ri ka pyrthei.
Katei ka jingpynthut ka la jia ha ka Sngi Thohdieng hapoh ka Hall No. 5 jong ka Bharat Mandapam. Kumba10 ngut ki dkhot ka IYC ki la pynlong ïa ka jingïakhih ba shi por ha ryngkat ki jingpyrta shla pyrshah ïa u Myntri Rangbahduh ka ri bad kynthoh ruh ïa ka jingtyrwa khaïi hapdeng ka India bad ka Amerika.
Kitei ki nongïakhih la ïathuh ba ki la ïoh rung sha katei ka jaka da kaba pyndonkam ïa ki ‘QR-Code Pass’. Hynrei na ka liang ki pulit ka Delhi mardor ki la bat bad rah noh ïa ki sha thanad Tilak Marg na bynta ka jingtohkit.
